web counter
LEXO PA REKLAMA!

SHKARKO APP

App Store
Google Play

E fundit!

x

Lindi në kampin e refugjatëve dhe ka luajtur te Bayern, lojtari i Australisë futet në histori

15 Qershor 2026, 18:11, Sport CNA

Lindi në kampin e refugjatëve dhe ka luajtur te Bayern, lojtari i

Australia e nisi me fitore rrugëtimin e saj në Kupën e Botës, duke mposhtur Turqinë me rezultatin 2-0. Protagonisti kryesor i sfidës ishte Nestori Irankunda, i cili realizoi golin e parë të takimit në minutën e 27-të dhe hyri në historinë e futbollit australian si golashënuesi më i ri i vendit të tij në një Kampionat Botëror.

Përtej rëndësisë së golit, historia personale e Irankundës tërheq po aq vëmendje sa edhe paraqitjet e tij në fushë. Futbollisti lindi në vitin 2006 në një kamp refugjatësh në Tanzani. Prindërit e tij kishin lënë Burundin për shkak të luftës civile dhe më pas familja u vendos në Australi, vendi që sot ai përfaqëson në arenën ndërkombëtare.

Rritja e tij futbollistike erdhi te Adelaide. Pikërisht aty Irankunda tregoi potencialin e tij, duke tërhequr vëmendjen e klubeve europiane. Me fanellën e skuadrës australiane regjistroi 16 gola dhe 8 asistime, statistika që e ndihmuan të ndërmarrë hapin më të rëndësishëm të karrierës së tij deri në atë moment.

Në vitin 2024 ai u transferua te Bayern Munich. Kalimi te një nga klubet më të mëdha në Europë i dha mundësinë të stërvitej me futbollistë të nivelit më të lartë, mes tyre edhe sulmuesi anglez Harry Kane. Megjithatë, konkurrenca e fortë në skuadrën gjermane bëri që minutat në ekipin e parë të ishin të kufizuara.

Për të vazhduar zhvillimin e tij dhe për të fituar më shumë hapësira në fushë, Irankunda u huazua fillimisht te Grashoper në Zvicër. Më pas ai vendosi të vazhdonte karrierën në Angli, duke u transferuar te Ëatford. Ky vendim u konsiderua i rëndësishëm për progresin e tij, pasi i dha mundësinë të luante rregullisht dhe të fitonte eksperiencë në nivele të larta.

Puna e bërë në vitet e fundit u shpërblye me grumbullimin në Kombëtaren e Australisë për Kupën e Botës. Dhe pikërisht në debutimin e tij në këtë skenë, ai arriti të lërë menjëherë gjurmë. Në minutën e 27-të të ndeshjes ndaj Turqisë, Irankunda mori topin, realizoi një depërtim të shpejtë individual dhe finalizoi me saktësi për t’i dhënë avantazhin skuadrës së tij.

Ky gol rezultoi vendimtar për rrjedhën e takimit dhe i hapi rrugën suksesit 2-0 të Australisë. Paraqitja e tij mori vlerësime edhe nga trajneri Postekoglou, i cili e cilësoi momentin si një ngjarje që mund të ndikojë ndjeshëm në vazhdimësinë e karrierës së futbollistit.

Brenda grupit të Australisë, Irankunda konsiderohet një nga talentet më të rëndësishme të brezit të ri.

Nga një kamp refugjatësh në Tanzani deri në skenën më të madhe të futbollit botëror, rrugëtimi i Irankundës vazhdon të shkruajë kapituj të rinj. Në moshën 20-vjeçare, ai tashmë ka hyrë në historinë e futbollit australian dhe ka nisur Botërorin me një gol që do të mbahet mend gjatë nga tifozët e Australisë.





Lajmet e fundit nga