E fundit!

18:37 Aktualitet

Mbahet sot protesta e 16-të kundër qeverisë

Këtë të hënë në Tiranë po vijon sërish protesta qytetare k...

Manastirin ikonik të Kievit e përfshin zjarri gjatë sulmeve vdekjeprurëse të Rusisë

15 Qershor 2026, 16:15, Kosova & Bota CNA

Manastirin ikonik të Kievit e përfshin zjarri gjatë sulmeve

Rusia e ka goditur kompleksin e mbrojtur nga UNESCO-ja, Kyiv-Pechersk Lavra, manastirin më të rëndësishëm ortodoks të Ukrainës, gjatë një sulmi shumë të madh me raketa dhe dronë gjatë natës, duke i vrarë të paktën 11 njerëz në mbarë Ukrainën.

Sulmet ndodhën vetëm disa orë pasi presidenti amerikan, Donald Trump, zhvilloi një bisedë telefonike me liderin rus, Vladimir Putin, dhe theksoi se dëshironte të ndihmonte për t’i dhënë fund luftës.

Si pasojë e sulmeve, një pjesë e kompleksit historik të manastirit u përfshirë nga zjarri, si dhe u plagosën të paktën 13 njerëz në vendngjarje. Autoritetet raportuan dëme të mëdha në gjithë Kievin si rrjedhojë e një prej sulmeve ajrore ruse më të mëdha që nga fillimi i luftës.

Sipas Forcave Ajrore të Ukrainës, Rusia lëshoi gjatë natës një breshëri prej 70 raketash dhe 611 dronësh kundër Ukrainës, duke synuar kryesisht kryeqytetin Kiev. Edhe qytetet Dnipro dhe Harkiv u goditën.

"Kështu Rusia i tregon botës synimin e saj për ta vazhduar luftën", shkroi presidenti ukrainas, Volodymyr Zelensky, në X pas sulmeve ruse.

Ministri i Brendshëm i Ukrainës, Ihor Klymenko, tha se sulmet ruse vranë pesë punonjës të ekipeve të shpëtimit dhe plagosën të paktën pesë të tjerë në Harkiv, qytetin e dytë më të madh të Ukrainës, i cili ndodhet në verilindje të vendit.

“Në Harkiv, pesë shpëtimtarë të Shërbimit Shtetëror të Emergjencave u vranë ndërsa po luftonin zjarret e shkaktuara nga sulmet e përsëritura ruse. Të paktën pesë të tjerë u plagosën”, shkroi Klymenko në Telegram.

Autoritetet thanë gjithashtu se gjashtë njerëz, përfshirë një foshnjë, u plagosën nga një zjarr në Muzeun e Artit të Harkivit si pasojë e një sulmi ajror rus.

“Një zjarr i lokalizuar ka shpërthyer në ndërtesën e muzeut të artit, duke përfshirë një sipërfaqe prej 1.200 metrash katrorë. Po punohet për shuarjen përfundimtare të tij”, njoftuan autoritetet e shërbimit të emergjencave të Ukrainës.

Ndër ndërtesat e goditura në Kiev ishte edhe katedralja kryesore e kompleksit historik Kyiv-Pechersk Lavra, (Manastiri i Shpellave), një zonë e Trashëgimisë Botërore të UNESCO-s, ku zjarrfikësit vazhduan të luftonin zjarrin në orët e para të së hënës.

“Një sulm brutal ndaj popullit tonë dhe trashëgimisë sonë. Kjo është fytyra e vërtetë e vlerave ortodokse të Rusisë”, shkroi kryeministrja ukrainase, Yulia Svyrydenko, në platformën X.

Më shumë se një duzinë automjetesh zjarrfikëse u panë pranë manastirit gjatë mëngjesit, ndërsa zjarrfikësit punonin për të shuar zjarrin si nga brenda ndërtesës, ashtu edhe nga platformat e jashtme, raportoi një gazetar i AFP-së në vendngjarje.

Ministri i Jashtëm ukrainas, Andriy Sybiha, dënoi sulmin rus ndaj manastirit më të rëndësishëm ortodoks të Ukrainës, duke e cilësuar atë si “barbarizëm shtetëror”.

Shefja e politikës së jashtme të BE-së, Kaja Kallas, e dënoi sulmin ndaj civilëve ukrainas dhe ndaj manastirit shekullor Kyiv-Pechersk Lavra, duke thënë se "këto janë krime lufte dhe Rusia do të duhet të përgjigjet për to".

Ndërkohë, mediat shtetërore ruse cituan Ministrinë e Mbrojtjes së vendit, e cila pretendoi se manastiri Kyiv-Pechersk Lavra ishte goditur nga një raketë e sistemit Patriot me të cilin Kievi është furnizuar nga SHBA-ja, si pasojë e ndonjë defekti ose e raketave të skaduara të ofruara nga vendet perëndimore.

Më vonë gjatë ditës, Shërbimi Sekret i Ukrainës (SBU) publikoi një deklaratë ku thuhej se Rusia e kishte goditur Kyiv-Pechersk Lavrën me një dron Geran-2, i cili është versioni rus i dronit kamikaz të tipit iranian Shahed.

Agjencia publikoi gjithashtu fotografi të asaj që tha se ishin mbetje të dronit të dyshuar.

"Hetuesit e Shërbimit të Sigurisë e kanë klasifikuar sulmin si krim lufte dhe tashmë kanë hapur procedurë penale", shtoi ajo.

Kryetari i bashkisë së Kievit, Vitali Klitschko, tha se sulmi “masiv” gjatë natës shkaktoi dëme dhe zjarre pothuajse në të gjitha qarqet e kryeqytetit. Autoritetet njoftuan se katër njerëz u vranë dhe të paktën 25 të tjerë u plagosën, përfshirë fëmijë.

Shërbimi Shtetëror i Emergjencave raportoi gjithashtu se pas sulmit shpërtheu zjarr në Kompleksin Kombëtar të Muzeut të Artit dhe Kulturës “Mystetskiy Arsenal” në Kiev, institucioni kryesor kulturor i Ukrainës, duke përfshirë një sipërfaqe prej rreth 1.000 metrash katrorë.

Rusia goditi gjithashtu Studiot Kombëtare të Filmit “Dovzhenko”, një nga studiot më të vjetra të filmit në Ukrainë, e themeluar në vitin 1927 në Kiev, njoftoi ministrja e Kulturës, Tetyana Berezhna, në Facebook.

Ndërkohë, Kievi ka vazhduar sulmet e tij të shpeshtuara së fundmi kundër shënjestrave industriale dhe infrastrukturës energjetike të Rusisë, në përpjekje për t’ia ndalur Kremlinit burimet financiare që po i përdor për ta financuar luftën kundër Ukrainës.

Guvernatori rajonal Dmitry Milyayev njoftoi në Telegram se tre njerëz u vranë dhe tre të tjerë u plagosën në një sulm ukrainas me dronë ndaj qytetit rus Tula, rreth 200 kilometra në jug të Moskës.

Nuk është e qartë se cilat objekte ishin goditur, por rajoni i Tulës strehon disa nga objektet më të mëdha industriale të Rusisë dhe ka qenë shpesh shënjestër e sulmeve ukrainase që prej fillimit të pushtimit të plotë të Ukrainës në shkurt 2022.

Gjithashtu, në orët e para të së hënës, autoritetet e instaluara nga Kremlini në zonat e pushtuara të rajonit ukrainas të Hersonit deklaruan se sulmet ukrainase kishin dëmtuar dy ura dhe se qarkullimi ishte pezulluar./rel