Sukses historik për Skocinë, lë pas Brazilin dhe Marokun

14 Qershor 2026, 11:42, Sport CNA

Kombëtarja e Skocisë ka shënuar një nisje pozitive në Kampionatin Botëror, duke mposhtur Haitin me rezultatin minimal 1-0 në ndeshjen e Grupit C. Ky duel shënoi rikthimin e skocezëve në një fazë finale të këtij turneu për herë të parë në shekullin e 21-të.

Skuadra e drejtuar nga Clark mori kontrollin që në fillim, ku sulmuesi Ben Ganon-Dok rrezikoi portën kundërshtare që në minutën e tretë, duke detyruar portierin të bënte një pritje të bukur. Haiti u përgjigj me një tentativë të Dedson, duke ushtruar presion në 15 minutat e para.

Pasi kaloi presionin fillestar të Haitit, Skocia iu afrua golit në minutën e 17-të përmes një goditjeje të fortë të Scott McTominay nga skaji i zonës, e cila u ndal nga shtylla. Goli i vetëm i takimit erdhi përpara se të mbushej gjysmë ore lojë.

Pas një tentative të Che Adams të bllokuar nga portieri, mesfushori John McGinn goditi saktë, duke e dërguar topin në rrjetë me ndihmën e një devijimi.

Ky realizim i dha fund një pritjeje 28-vjeçare të Skocisë për një gol në Botëror, që mungonte nga viti 1998, duke e bërë lojtarin e Aston Vilës golashënuesin më të vjetër në moshë të Skocisë në një fazë finale.

Skocia pati një tjetër mundësi të mirë me anë të Shankland, i cili goditi me kokë jashtë kuadratit. Megjithatë, Haiti krijoi gjithashtu situata të rrezikshme; portieri skocez Angus Gun nuk arriti të kontrollonte një goditje të fortë të Ruben Providens, por mbrojtja reagoi shpejt për të larguar rrezikun.

Në minutën e 70-të, McGinn humbi mundësinë për të dyfishuar shifrat duke gjuajtur jashtë nën presionin e mbrojtësit Ricardo Ade. Skuadra e Haitit, e drejtuar nga Sebastian Migne, shtoi presionin në minutat e fundit, ku sulmuesi Isidor dhe anësori Providens rrezikuan seriozisht mbrojtjen skoceze. Pavarësisht një goditjeje të fundit me kokë nga Pierrot që doli jashtë, Skocia arriti të mbronte avantazhin, duke siguruar fitoren e saj të parë në një Botëror që nga viti 1990.

Ky rezultat e pozicionon përkohësisht Skocinë në krye të Grupit C përpara përballjeve të radhës me Marokun dhe Brazilin.