web counter
LEXO PA REKLAMA!

SHKARKO APP

App Store
Google Play

Lotët e Lulit

14 Dhjetor 2024, 10:20, Editorial CNA
Lotët e Lulit
Lulzim Basha

Në disa dalje mediatike të javëve të fundit, Lulzim Basha është parë sa i përulur, sa i ndjerë, diku gënjeshtar në çmenduri, diku tjetër i çmendur nga dashuria, nga pasioni për politikën, për Berishën, për të shkuarën, në një cep edhe për të ardhmen.

Në daljen e fundit te gazetari totalisht i ekspozuar dhe aspak i vërtetë, Ylli Rakipi, u pa një Luli tjetër, u pa Luli që qante për doktorin.

Nga ana tjetër, doktori ishte te Fevziu dhe në fund qau edhe ai për Lulin. Po qanin të dy për njëri-tjetrin, doktori si e kishte zhgënjyer Luli dhe Luli që doktori nuk e kishte lënë të qetë, që doktori nuk kishte ndjenjur në hije dhe që doktori nuk kishte pranuar të largohej.

Lotët e Lulit
Sali Berisha dhe Lulzim Basha

Në fakt, lotët e Lulit në këto dalje mediatike janë e vërteta më e madhe edhe e zhgënjimit të doktor Saliut.

Lotët e Lulit fillojnë në korrik të vitit 2013, kur doktor Sali Berisha zgjodhi që të vendoste një leckë në krye të PD-së, një njeri pa asnjë kontribut në Partinë Demokratike, e mori nga rruga, e bëri ministër Transportesh e i plasën skandalet, e bëri ministër të Jashtëm e i plasën skandalet, e bëri ministër të Brendshëm e i plasën skandalet, vrau edhe njerëz në rrugët e Tiranës, i përgjaku ato.

Berisha e bëri kryetar bashkie, Tirana ndali kohën dhe më pas e vendosi në krye të PD-së. Opozita dhe vetë PD ndalën kohën, bënë regres.

Vendosja e një lecke që Saliu ta përdorte për të fshirë pllakat e korridoreve të Partisë Demokratike, apo për të goditur ata që i kishte ngelur hatri në pleqëri është e vërteta e lotëve të Lulit.

Lulzim Basha e di mjaft mirë se përse e vendosi Sali Berisha atje, ashtu si edhe doktori e di mjaft mirë, të gjithë demokratët e dinë.

Lotët e Lulit
Sali Berisha dhe Lulzim Basha

E vërteta është një, ajo që është parti që ka shumicën dërrmuese të mbështetësve të saj Berishistë, pjesa tjetër janë opozitarë, por diku edhe ndonjë votë gri që lëkundet sipas interesave në momente të caktuara.

Lotët e Lulit janë lotët e regresit të opozitës. Lotët e Lulit janë lotët e 12 viteve të opozitarëve që shkuan në protesta, që luftuan dhe u tradhtuan nga Lulzim Basha dhe Sali Berisha, u shitën nga Luli.

Berisha i tradhtoi në 2013-ën, Lulzim Basha nuk e fitonte kurrë pa mbështetjen e tij Partinë Demokratike.

Lotët e Lulit
Lulzim Basha

Janë lotët e tradhtisë të vitit 2017, jo te çadra se çadra ishte një marrëzi që e di mjaft mirë dhe vetë Luli dhe doktori, por te goditja që iu bë opozitarëve në atë vit, te përçarja, të cilën e bëri Luli, por e kuronte doktori .

Ishte po doktori që në 2021-shin, edhe pse PD-ja humbi zgjedhjet i dha kohë Lulit, leckës së tij që të rimerrte PD-në derisa më pas kaluan disa javë apo dy muaj dhe Luli tentoi që nga leckë të bëhej fshesë për ta hedhur në kosh doktorin e tij.

Tani lotët e Lulit nuk i vlejnë më askujt, edhe sikur të jenë sa oqeani Atlantik, me apo pa peshq, me apo pa Ylli Rakipin, me apo pa mbeturinat që ka vërdallë./ CNA





Lajmet e fundit nga