Pak rreshta për Sokol Olldashin

20 Nëntor 2024, 18:13, Editorial Elvi FUNDO

Sokol Olldashi

Bëhen 11 vite që Sokol Olldashi është ndarë nga jeta.

Dikush e quan sypatrembur, dikush me fjalën shpatë, dikush një djalë me karakter të fortë, me një natyrë ndryshe, dikush politikanin e munguar të PD-së.

Në fakt, PD-ja kishte shpresë te Sokol Olldashi, por ndodhi ndryshe. Megjithëse është një përvjetor i dhimbshëm, shprehja ‘karma is a b*tch’ i shkon shumë politikës së sotme të opozitës.

Atëherë mendonte se kryebashkiaku i Tiranës, Lulzim Basha duhet të merrte PD-në, ta drejtonte, do të ringrihej, ishte një politikan virtuoz, një diplomat i shkëlqyer, në fakt doli që ishte një hiç.

Lulzim Basha

Dhe Sokoli i humbur, diku atje në një cep të Parajsës, sot qesh nga lart me dhimbje, me dhimbjen se si është sot opozita, me dhimbjen që ai u anatemua, u sulmua, u akuzua, u vodh padrejtësisht për të çuar opozitën në një gjendje të tillë, pa asnjë diskutim edhe Shqipërinë, sepse me një Sokol do të kishim një opozitë Sokolash dhe jo një opozitë Lulashësh të pavlerë.

Ishte ironik, kishte humor, ishte poet, këndonte, ishte ministër i suksesshëm, politikan i zgjuar, u tradhtua, humbi por nuk u dorëzua, humbi se e vodhën, siç ia vjedhin opozitës votat.

In memoriam/ Sokol Olldashi – një mik, një udhëheqës, një frymëzim
20 Nëntor, 12:23
10 vjet nga tragjedia/ Çfarë mbetet nga Sokol Olldashi?
20 Nëntor, 19:20

Brenda opozitës ka një tragjikomedi sepse i vodhi votat të ardhmes së saj dhe e ardhmja e saj ishte Sokol Olldashi, i cili nuk është më, por është më i fortë dhe më ekzistent se kurrë.

Sokol Olldashi kujtohet, respektohet dhe nderohet. Ata që e vodhën, ata që i morën PD-në duke e konsideruar pronë, ata që e drejtuan PD-në duke e mjelë sot janë të neveritur, të pështirë, të braktisur, të pavlerë.

Sokoli do të kujtohet dhe do të kujtohet gjithmonë, pikërisht për një arsye të thjeshtë, ishte i vërtetë në një garë të drejtë, u tradhtua, u vodh, por zgjodhi të ishte i përjetshëm.

Sokol Olldashi

Ky ishte Sokol Olldashi, një nga miqtë më të mirë të demokratëve, një nga miqtë më të mirë të gazetarëve, një nga miqtë më të mirë të politikanëve, një djalë ndryshe, sa virtuoz aq edhe melodioz, sa politikan aq edhe qytetar, sa djalë i mbarë edhe pak “rrugaç”, sa i drejtpërdrejtë aq edhe i mendueshëm, kurrë nuk ishte naiv, ishte i ditur.

Për gjithçka dha apo ndodhi, sot Sokoli kujtohet, do të kujtohet, ndërsa ata të cilët menduan se e kishin përballë dhe e mundën e kanë humbur betejën. Edhe pse në mungesë, Sokoli fitoi pa qenë prezent në një betejë, të cilën e ka fituar në përjetësi./ CNA