web counter
LEXO PA REKLAMA!

SHKARKO APP

App Store
Google Play

E fundit!

x

NJË PËRGJIGJE SHTERUESE PËR GJENERAL CENSORIN MEDIATIK, ALDOR NINI

3 Tetor 2024, 10:42, Editorial Xhovan Shyti
NJË PËRGJIGJE SHTERUESE PËR GJENERAL CENSORIN MEDIATIK, ALDOR
Aldor Nini

Prej tre muajsh kompania mediatike “City News Albania” (CNA) gjendet nën goditjet kriminale të njëfarë Aldor Nini, fare i panjohur më parë prej meje përgjatë mbi 30 viteve punë në gazetari, por i njohur sakaq si censor mediatik që të bëka gjëmën dhe nuk i hyn gjemb në këmbë.

Një e vërtetë kjo, të cilën CNA dhe unë si administrator i saj, po e vuajmë mbi supet tona. Megjithëse kemi gjithë të drejtën mediatike, ligjore e morale me vete, ndonëse në solidaritet kemi gjetur përkrahje nga institucione e shoqata mediatike ndërkombëtare, falë ndërhyrjes kriminale të Aldor Ninit, poseduesit të “Acromax”, faqja jonë në rrjetet sociale vijon të jetë e bllokuar.

Vijon të mos jetë në funksion në “Instagram” dhe e mbyllur në rrjetet sociale “TikTok”, “YouTube” e “Facebook”. Me pak fjalë, ky farë “Acromax Nini”, ka marrë përsipër të luajë rolin e “gjeneralit” suprem të medias, më shumë se 90% të së cilës e ka vënë në rresht dhe e urdhëron si dhe sa herë, edhe atë vetë e urdhërojnë ata që e kanë graduar “gjeneral” censor mediatik.

Gradat “Acromax Ninit” ia kanë dhënë ata që e komandojnë me kushtin e vetëm që të mos lejojë asnjë media të njollosë realitetin e “Rilindjes” së vendit, nën qeverisjen 11-vjeçare të qeverive Rama 1, 2, 3, si dhe pushtetin “5D” të bashkisë së Erion Veliajt.

Nëse Aldor Nini i “Acromax”-it është “ushtar” i Edi Ramës apo i pushtetit “5D” së Erion Veliajt kjo s’ka kurrfarë rëndësie, pasi me rolin e censorit mediatik që ai luan u shërben të dyve. Madje akoma më shumë duke censuruar mediat “Acromax Nini” i bën shërbim antiligjor gjithë pushtetit të “Rilindasve” që e kanë shpënë në vdekje klinike republikën tonë të gjorë. 

Me pak fjalë, Aldor Nini është pjellë e pushtetit që u zotua triumfalisht se do të lulëzonte Shqipërinë e lënë të shkretë nga qeveritë Berisha 2005-2013. Aldor Nini është njëri nga “Rilindasit” e devotshëm, që si CEO i kompanisë “Acromax”, të regjistruar në Gjermani, shfrytëzon të drejtën e autorit për të kërcënuar e mbyllur gojën atyre 2 apo 3 mediave të mbetura që guxojnë të “nxijnë” realitetin rilindas. Nën këtë devizë, “Acromax Nini” ka shtrirë përdhe, sikurse përmendëm, më shumë se 90% të mediave (duke përfshirë dhe ato që mosbindjen e kanë me doreza).

Kompania mediatike “City News Albania” ishte dhe vijon të jetë e vetmja e qenë jashtë stanit të “Acromax Ninit”, është e vetmja që zbuloi dhe nisi betejën denoncuese me Erion Veliajn për aferën e incerenatorit të Tiranës, që ka ngrënë 130 milionë euro të buxhetit të taksapaguesve pa u ndërtuar kurrë. CNA është e vetmja media që shpërtheu publikisht skemën e aferës “5D” të bashkisë së Erion Veliajt, por jo vetëm.

Pasi iu prek padroni dhe për më tepër kur seria e shkrimeve denoncuese të CNA-së ndaj aferave të bashkisë Veliaj vijoi, Aldor Nini e mprehu edhe më shumë shpatën kundër “së pabindurës” CNA. Në mosgjetje të një argumenti mendjembushës, “Acromax Nini” sajoi shkeljen e së drejtës së autorit nga CNA për të ngritur dyfekun. Na akuzoi si përvetësuese të së drejtës së autorit, edhe pse për çdo transmetim ne disponojmë autorizimet e mediave autore të fragmenteve ilustruese.

CNA disponon autorizim ligjor me firmë e vulë nga televizionet “Vizion Plus”, “Klan”, “Syri TV”, “ABC News”, “Euronews.”

Në rolin e “gjeneralit me spaleta rilindasi”, “Acromax Nini” na urdhëroi të fshinim çdo lajm që kishim publikuar, e që sipas tij shkelte të drejtën e autorit, por ne vijuam mosbindjen pasi ligjërisht ishim OK. Kundërshtimi ynë ligjor e acaroi “gjeneral” Ninin e mësuar me sjelljen prej YES Man-i, të pronarëve të mediave e organizatave që pretendojnë se mbrojnë fjalën e lirë.

I përvëluar nga mospranimi i CNA-së për t’u rreshtuar, Aldor Nini, që i ka mbushur mendjen vetes se “torta” mediatike shqiptare është e gjitha e veta, gjeti të godasë jo kompaninë CNA, por Elvi Fundon, që përveçse qenies aksioner nuk ka ndonjë rol drejtues në stafin teknik të CNA-së.

Thanë e çfarë nuk thanë për z.Fundo, që prej vitesh e shkon jetën në Gjermani. Sajime që veç fantazitë e mendjeve të curufjepsura mund t’i sajojnë. Kur u bindën se nuk mund ta shtinin në xhep CNA-në, mobilizuan ushtrinë e zagarëve mediatikë si presion dhe kur sërish korrën refuzimin e shërbestarisë dhe dy standardeve, “Acromax Nini” ndërmori aktin kriminal të bllokimit të faqes së CNA-së në rrjetet sociale.

Akti i paprecedent u ndërmor kur gjeneral censori, Aldor Nini, e pa veten protagonist të kronikës së zezë. Në një ngjarje sa të turpshme aq edhe të dhimbshme e antiligjore, që lidhej me familjen e tij. Ngjarjen për të cilën Aldor Nini përfundoi i ndaluar nga policia, i proceduar dhe për të cilin vijon gjykimi, e publikoi veç CNA-së, përkundër heshtjes së turpshme nga më shumë se 90% e medias së qenë nën thundrën e censorit.

CNA e ka ndjekur dhe publikuar në dinamikë sjelljen e turpshme me të afërmit e tij, duke vijuar standardin e gazetarisë, pa pyetur pse protagonist është “gjeneral” Nini. Sepse CNA nuk luajti e nuk luan nga standardi profesional, nuk i ndan njerëzit në të nënës e të lopës, pasi në praktikën e vet editoriale CNA mbështetet në sentencën: “Të gjithë janë të barabartë përpara ligjit”. Një sjellje kjo që nuk i shkon midesë së “gjeneral censorit” Aldor Nini, i cili, edhe pse i humbur në përballje gjyqësore me z. Fundo e i urdhëruar nga Gjykata e Këlnit të çlirojë faqet e bllokuara të CNA-së, vijon të bëjë cubin. Ditën e diel Aldor Nini ndërmori të tjera sulme që mbyllën faqen e CNA-së në “Facebook”, me mendimin se do të na mbyllë gojën.

Pavarësisht të gjitha sulmeve dhe përpjekjeve të Aldor Ninit dhe “Acromax”-it për të na censuruar, CNA do të vazhdojë misionin e saj për të raportuar të vërtetën, pa u ndikuar nga askush dhe nga asgjë./ CNA





Lajmet e fundit nga