E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Aeroplani pa bisht i Erion Veliajt

15 Shtator 2024, 14:13, Editorial CNA

Kryebashkiaku i Tiranës, Erion Veliaj

Në kryeqytet dje është zhvilluar Asambleja e Socialistëve, një asamble e thirrur nga kryeministri Edi Rama menjëherë pas asaj kombëtare, ku kreu i PS-së dhe kryeministri, Edi Rama, zgjodhi drejtuesit politikë të qarqeve.

Një asamble e detyruar e Ramës, e cila erdhi menjëherë pas veprimeve të Erion Veliajt, kryebashkiakut të kryeqytetit, i cili raportoi në mediat e tij se kryeministri dhe kreu i PS-së e kishte ngarkuar me detyrën e kryekoordinatorit të Tiranës, ai ishte kryedrejtuesi, detyrat do t’i ndante ai, ndërsa Ogerta Manastirliu dhe Elisa Spiropali do të ishin zaret e tij, shërbëtoret e tij, do t’i raportonin për gjithçka që ndodhte. (Lexo këtu)

Fotomontazh - Edi Rama, Ogerta Manastirliu, Elisa Spiropali dhe Erion Veliaj

Në fakt, e vërteta ishte krejt ndryshe, mediat e Veliajt gënjyen, propaganda e 99-çave dhe servilëve të pushtetit dështoi.

Edi Rama, i ndodhur përballë këtij fakti dhe presionit të dy drejtueseve të tjera poliike, ka reaguar menjëherë, ka thirrur Asamblenë e PS-së në Tiranë.

Në këtë Asamble, Rama është mësuar të ketë thënë se në Bashkinë e Tiranës ka ndodhur diçka e rëndë, ai nuk do të merret me drejtimin e fushatës, por do t’u shërbejë qytetarëve në bashki. (Lexo këtu)

Erion Veliaj

Kryeministri ka theksuar se do të kemi dy shinat e fushatës, Ogerta Manastirliu, e cila do të drejtojë strukturat dhe PS-në në Tiranë, Elisa Spiropali do të drejtojë 4 bashkitë e tjera të Vorës, Kamzës, Rrogozhinës dhe Kavajës, ndërsa Erion Veliaj do të merret me punët e bashkisë.

I menjëhershëm ka qenë reagimi i Veliajt në atë moment, ku ka thënë se tashmë “avioni i tij do të punonte me dy motorë”. Kryebashkiaku i Tiranës ka dashur të theksojë se do të jetë në maksimum të punës së tij, do të fluturojë ditë e natë në shërbim të fitores së zgjedhjeve të 2025-ës, për t’i shërbyer kryeministrit Rama.

Kuptohet servilizmi dhe lëpirja e Ramës e bërë në sy të anëtarëve të të gjithë Asamblesë, por reagimi kryeministrit ka qenë i menjëhershëm: “Mjafton të qëndrosh si lokomotivë sepse kur fluturon shumë lart ulja nuk dihet”. (Lexo këtu)

Edi Rama dhe Erion Veliaj

Në fakt, Erion Veliaj është një aeroplan pa bisht, që tashmë ka fluturuar shumë lart dhe ulja e tij duket se është e destinuar të shkojë drejt 313-ës, pasi SPAK-u e ka kapur në ajër nga të gjitha skandalet, aferat dhe po e heton për çështjen e inceneratorëve, për çështjen e dosjes “5D”, për çështjen e Teatrit Kombëtar, për çështjen e shembjeve te “5 Maji”, si dhe po bën një hetim pasuror ndaj tij dhe familjarëve të tij. (Lexo këtu)

Një aeroplan pa bisht është Erion Veliaj dhe asgjë më shumë sesa kaq. Jo pa qëllim, kryeministri Edi Rama e ka marrë dhe e ka izoluar duke e mbyllur në Bashkinë e Tiranës dhe duke u dhënë strukturave të kryeqytetit një emër tjetër, Ogerta Manastirliun.

Këtë lëvizje, Rama ndoshta e ka bërë për të shkarkuar disi urrejtjen që strukturat kanë ndaj kryebashkiakut Veliaj, një fytyrë që as vetë socialistët e Tiranës nuk e pranojnë më, jo më qytetarët. (Lexo këtu)

Kryeministri Edi Rama

Kryeministri tashmë këtë e ka kuptuar, ndoshta duke lexuar sondazhet dhe informacionet që ai mbledh në kryeqytet për mllefin, urrejtjen dhe pakënaqësinë që kanë ndaj kryebashkiakut Erion Veliaj dhe të gjitha këto Edi Rama kërkon t’i shmangë që të mos i përkthehen vota kundër tij në zgjedhjet parlamentare të 2025-ës.

Për këtë arsye ka larguar Erion Veliajn nga strukturat e partisë së Tiranës, duke qenë se ky i fundit nuk kishte çfarë të jepte, nuk jepte dot energji dhe nuk nxiste dot më organizimin e bazës së partisë. Këtë detyrë tashmë do ta ketë Ogerta Manastirliu, ndërsa Veliaj është dërguar te cepi dhe është mbyllur në zyrën e tij në bashki./ CNA