Sikur Gazi & Co të kishin të njëjtin vullnet kundër Veliajt

5 Shtator 2024, 11:02, Editorial CNA

Sikur Gazi & Co të kishin të njëjtin vullnet kundër

Gazment Bardhi dhe Agron Gjekmarkaj

Dje u zhvillua mbledhja e Këshillit të Mandateve, ku pati një debat të fortë ndaj deputetit Vullnet Sinaj, ky i fundit një personazh jo i përfolur, jo i lakuar nga socialistët, një biznesmen që akuzohet se ka përfituar tenderë publikë me vlerën 20 apo 30 milionë lekë.

Në fakt, Vullnet Sinaj është një kontribues i madh në buxhetin e shtetit si pronar i rrjetit “Big Market” dhe bëhet fjalë për 20 apo 30 milionë lekë të vjetër në total përfitim nga fondet, nga garat në prokurime, por jo fitim. Në total, fitimi i atyre vlerave mund të jetë shumë herë më i vogël, mund të jetë 2 apo 3 milionë lekë të vjetër, ndoshta edhe diçka më shumë. (Lexo këtu)

Vullnet Sinaj në mbledhjen e Këshillit të Mandateve

Politika kështu e ka, ndoshta ai nuk duhet t’i fitonte këto shuma parash, nuk duhet të kishte marrë pjesë në tenderë. Tashmë opozita e ka kapur me një thërrime dhe kërkon që thërrimen ta bëjë bukë, ta thekë mirë dhe pastaj ta grijë, siç ndodh zakonisht dhe është në të drejtën e saj.

Por ajo që është problematike është fakti se pse Gazment Bardhi dhe një pjesë e madhe e grupit parlamentar të PD-së nuk kanë të njëjtin vullnet si ndaj Sinajt për të qenë kundër Erion Veliajt. (Lexo këtu)

Gazment Bardhi

Vullnet Sinajt i bëhet gjyqi për 2 apo 3 milionë lekë, apo 5 maksimumi fitim, ndërkohë që paguan qindra miliona lekë taksa dhe që ka paguar dhjetëra apo qindra miliona të tjera donacione e ndihma.

Shumë nga këta deputetë, përfshi këtu dhe Gazment Bardhin, që kapen pas Sinajt nuk shkojnë në protestë kundër kryebashkiakut të Tiranës, nuk merren me Veliajn, me kreun e organizatës së “5D”-së, kryetarin e bashkisë, ku të gjithë drejtorët janë kapur në një skemë hajdute. Për herë të parë Shqipëria u skandalizua sepse nuk kishte korrupsion dhe ryshfet, por vetë drejtorët kishin hapur kompani për të marrë tenderë dhe për të fituar para. (Lexo këtu)

Erion Veliaj

Nuk dalin për Erion Veliajn e inceneratorit të Tiranës që nuk ekziston dhe që kryebashkiaku e ka paguar rreth 60 milionë euro direkt dhe rreth 60 milionë indirekt për shkak të skemës së dherave.

Nuk ka të njëjtin vullnet kundër Veliajt as Agron Gjekmarkaj, as Dhurata Çupi, as Ervin Salianji, as Saimir Korreshi, të cilët nuk i shikon në protestën kundër kryebashkiakut, nuk i shikon as të protestojnë për lirimin e Berishës, por janë një grup pazarxhinjsh të vegjël, pjesë e strukturës së Gazment Bardhit, që nuk flasin për Veliajn dhe Tiranën e mbuluar nga plehrat. (Lexo këtu)

Deputetët e PD-së në mbledhjen e Këshillit të Mandateve

Sikur opozita dhe këta personazhe të kishin vullnetin që kanë kundër Sinajt ndaj Erion Veliajt, atëherë do të ishin më të vërtetë. Por duke u marrë me thërrimet, duke braktisur dhe duke bërë sikur nuk kuptojnë një kryehajdut, një abuziv, një skandaloz që ka 6 dosje hetimore në SPAK siç është Erion Veliaj, tregojnë standardet e dhimbshme të opozitës që duket se nuk vuri mend kurrë./ CNA