web counter
LEXO PA REKLAMA!

SHKARKO APP

App Store
Google Play

E fundit!

x

Pse Edi Rama duhet të pranojë dështimin e komisionit “Xhafaj”?

22 Korrik 2024, 15:37, Editorial CNA
Pse Edi Rama duhet të pranojë dështimin e komisionit
Fatmir Xhafaj dhe Edi Rama

Një komision me një qëllim politik, goditjen e SPAK-ut. Kështu u quajt komisioni i posaçëm parlamentar, i cili u zbulua nga CNA disa muaj më parë dhe u ngrit nga mazhoranca, në drejtimin e Fatmir Xhafajt.

Ky i fundit deklaronte se kishte marrë mbështetjen e ndërkombëtarëve, por janë bërë 4 apo 5 seanca dhe qëndrimet e SHBA-së dhe të BE-së kanë qenë mjaft të forta kundër këtij komisioni, kundër veprimeve të tij dhe qëllimeve në hije të njeriut që po kërkon të lidhë duart e SPAK-ut në luftën kundër korrupsionit.

Në fakt, komisioni me një strategji për rrugën që duhet të ndjekin institucionet e pavarura drejt integrimit, në raportet që duhet të krijohen në përputhshmërinë ligjore në standardet e BE-së, është një gjë shumë pozitive dhe kryeministri Edi Rama e ka sqaruar disa herë.

Por mënyra se si u ndërtua ky komision, momenti kur u ndërtua, apo duke shkuar edhe më tej, marrja përsipër nga një individ problematik me drejtësinë, jo vetëm për familjarët e tij, por edhe për ndërhyrjet e forta që ai tenton të bëjë duke mbajtur nën kontroll segmente të caktuara të sistemit pas reformës, e rrëzuan komisionin.

Të ndërtosh një komision për rrugën e integrimit të vendit, për përputhshmërinë e institucioneve është njëra anë, por ndërkohë ka një komision për integrimin. Ndoshta mazhoranca kërkonte të ishte më eficiente, të kishte më shumë hapa përpara, por zgjodhi mënyrën e gabuar, formën e gabuar dhe njeriun e gabuar.

Prandaj dhe është koha që kryeministri Edi Rama ta pranojë, ta korrigjojë dhe të vendoset një komision i vërtetë, i cili mund të sjellë ndryshime ligjore, reforma në përputhje me standardet e BE-së në rrugën e Shqipërisë drejt integrimit. Mënyra ka shumë, kryeministri i di.

Fatmir Xhafaj nuk mund të udhëheqë Shqipërinë drejt Evropës.

Është njësoj si të ngrihet Enver Hoxha nga varri, të marrë flamurin e BE-së dhe ta vendosë mbi Piramidë, atje ku ka pasur muzeun e tij.

Për këtë arsye është koha që Rama të pranojë dështimin e komisionit “Xhafaj”, ku opozita nuk ka shkuar, ku ndërkombëtarët nuk e mbështesin, të krijohet një komision i gjerë, të amendohet, ndoshta në bashkëpunim dhe me opozitën, me negociata, me bashkëkryetarë, komision mbi palët, bipartizan, me rregulla të mirëpërcaktuara për rregullimet ligjore që kërkojnë institucionet e pavarura deri te vendimmarrja që do të duhet më pas në Parlament, ndoshta edhe me shumicë votash.

Kjo lloj reforme nuk mund të kalojë nga një komision i braktisur nga opozita, nga një komision i drejtuar nga Fatmir Xhafaj dhe nga një grup politikanësh të inatosur që kanë mllef me drejtësinë sepse po arreston hajdutët e Rilindjes dhe po rrezikon 99-çat e saj.

Askush nuk mund ta mohojë rolin e Ramës për Reformën në Drejtësi, atë ai e bërtet dhe thotë se është njeriu që e ka krijuar reformën dhe SPAK-un, por këtë herë Rama duhet të pranojë se Xhafaj i tij, apo më saktë i lali Erit duhet të tërhiqet dhe të bëjë një komision të vërtetë për reformën institucionale, e cila mund të shkojë kudo, por jo i njëanshëm, jo me enveristë, jo me qëllime për të goditur institucionet, por për t’i reformuar ato dhe për t’u dhënë drejtimin për në Evropë./ CNA

 





Lajmet e fundit nga