web counter
LEXO PA REKLAMA!

SHKARKO APP

App Store
Google Play

E fundit!

x

Liderët e partisë së re "djathtas" i mbyt protagonizmi personal pa filluar mirë punë

13 Tetor 2024, 17:31, Editorial CNA
Liderët e partisë së re "djathtas" i mbyt protagonizmi
Fotomontazh - Edvin Kulluri dhe Enkelejd Alibeaj

Që në daljet e para publike të liderëve të partisë së shpallur, por ende të paregjistruar, kemi parë një protagonizëm personal.

Me pretendimin e shpallur që në denominimin e deklaruar të subjektit të ri (ende të paregjistruar), se këta qenkan të djathtët e parë që ka parë toka shqiptare që nga vitit 1912, duken më shumë si pordhacë sesa si lider.

Ajo që përforcon pordhacërinë e këtyre të djathtëve "të vërtetë", është kakofonia dhe mungesa e koordinimit mes tyre.

Kështu, nëse Alibeaj si aktor i dobët dhe teatral, reciton kushte për bashkëpunim me këdo që pranon ato që liston ai, Kulluri nga ana tjetër, më i strukturuar, më i artikuluar dhe pa poza ngërçesh të tipit Alibeaj, është i qartë kur deklaron se PD e ka kryer misionin e vet dhe me të nuk ka kuptim bashkëpunimi.

Liderët e partisë së re "djathtas" i mbyt protagonizmi
Enkelejd Alibeaj

Nuk ka shumë dyshime në aftësinë e Alibeajt për të mos bashkëpunuar dot me asnjë frymor që i rri përqark. Alibeaj nuk di të lexojë mendimet e të tjerëve dhe as të punojë në ekip. Puna në grup për Alibeajn do të thotë që ai të lexojë materialet e përgatitura nga grupi dhe pastaj të ulet e të shkruajë një gjë, me synimin që të kundërshtojë totalisht çfarë ka konkluduar grupi. Ky është i vetmi talent i Alibeajt!

E ky talent nuk jep shumë shpresa kur shfrytëzohet për të ngritur një subjekt të ri politik.

Kulluri nga ana tjetër, ka më shumë eksperiencë në të folurën publike, pasi kohën e vet larg PD-së e ka shfrytëzuar duke u trajnuar si analist në studio televizive.

Liderët e partisë së re "djathtas" i mbyt protagonizmi
Edvin Kulluri

Por vështirë se Alibeaj e pranon si lider, ndaj konkurrenca që është shfaqur pa kursim dhe për gallatën e të gjithëve, mos u habisni që të degjenerojnë në krijimin e 2 grupeve brenda kësaj partie të re që nuk është regjistruar ende si e tillë.

Lexoni vetë se çfarë thonë në dy ditët e para të eksperiencës së të dyve si lidership i ri.

Kështu, ndërsa Alibeaj nuk përjashton koalicion me Bashën, Kulluri Bashës i kërkon të regjistrohet si subjekt politik e pastaj të ulen të diskutojnë.

Ajo që dallohet që pa u regjistruar akoma si subjekt politik në regjistrin e posaçëm, është tendenca për t'u paraqitur si konservatore dhe hedhja në treg e tezave në mbrojtje të familjes.

Në fakt, konservatorët kudo kanë si tezë të qenësishme temën e familjes dhe mbrojtjen e saj.

Në këtë pikë, të paktën Alibeaj bashkohet me Kullurin. Por është bashkim në demagogji dhe jo në bindje e qëndrimi personal. Kjo sepse menaxhimi që i kanë bërë deri tani familjeve të veta, i nxjerr pak zbuluar jo vetëm Alibeajn e Kullurin, por një pjesë të mirë të këtyre konservatorëve të Shqipërisë së vitit 2024.

Ndaj është vështirë të besohet se shqiptarët do dynden pas këtyre demagogëve të radhës.

Liderët e partisë së re "djathtas" i mbyt protagonizmi
Enkelejd Alibeaj

Alibeaj: "Ato që janë çështje që duhet të na puqin bashkë… synimi i koalicionit është, a arrijmë t’i bëjmë bashkë shqiptarët në teren?

Ajo që i bën bashkë shqiptarët dhe këtë e tregojnë sondazhet është mbështetja ndaj drejtësisë së re, e dyta a janë dakord shqiptarët që duan të kenë një sistem zgjedhor me lista të hapura që deputetët t’i zgjedhin vetë.

Një nga kushtet për koalicion është që të përdoren listat e hapura.

Dhe një çështje që duhet të na bëjë bashkë është që Shqipëria duhet të ketë marrëdhënie të shëndosha me komunitetin ndërkombëtar''

Kulluri: “Basha bën diku diplomantin në Këshillin e Europës, diku analistin, kur të kenë një subjekt, do ulemi të flasim ç’a na bashkon ç’a na ndan. Jo më parti imagjinare, nëse do e bëjnë parti dhe do heqin dorë nga qëndrimi jashtë dyerve të gjykatave, do bashkëpunojmë me këdo."

Liderët e partisë së re "djathtas" i mbyt protagonizmi
Edvin Kulluri

Më herët Kulluri do deklaronte: "Ne besojmë tek individi dhe të drejtat natyrore, politike e ekonomike e të patjetërsueshme, për jetën, lirinë, ndërgjegjen, fjalën e lirë dhe ushtrimin e lirë të fesë. Të drejtën për të qenë i lumtur, për të pasur pronë, për të ndërtuar pasuri dhe për të mbrojtur veten dhe familjet. Dinjiteti i njeriut është baza themelore e lirisë së tij.

Familja është ë baza e zhvillimit shoqëror për ne. Rritja e një familje të shëndetshme, mbi baza të traditës dhe barazisë shoqërore, është boshti i ndërtimit të shtetit dhe mirëqenies së individit."/ CNA





Lajmet e fundit nga