Linja editoriale e Irfan Hysenbelliut

3 Shtator 2022, 14:10, Editorial CNA

Dje në mëngjes, fadromat e IKMT-së kanë shkuar për të zbatuar ligjin në “Prestige Resort”, në një nga pronat e Irfan Hysenbelliut.

Ministria e Brendshme deklaroi se ishin rreth 4 mijë metra katrorë, ku ishte ndërtuar pa leje dhe duhej të rikthehej në gjendjen e mëparshme.

Ndërtim i cili ishte pa leje, sepse ishte dhënë një dokument për të plotësuar disa kritere, për të paguar taksat, etj por këto nuk u bënë kurrë.

Pra, objekti nuk ka leje. Irfan Hysenbelliu, sipas institucioneve, zyrtarisht ka ndërtuar pa leje.

Pa folur këtu për bllokimin e plazhit, pra kalimin në breg bllokuar me blloqe betoni.

Vetë Irfani dhe mediat e tij kanë filluar një fushatë të madhe, duke thënë se sulmi nuk është ndaj një hoteli dhe ndaj një pishine, por ndaj linjës editoriale të “News 24”, “Balkan Web” dhe gazetës “Panorama”.

Në fakt kjo është qesharake, pasi përse duhet ta sulmonte Edi Rama dhe Qeveria “News 24” apo mediat e Irfan Hysenbelliut, kur ato prej nëntë vitesh, ndoshta edhe më shumë, janë mëngjes, drekë, darkë në shërbim të kryeministrit.

Le të dalë ndonjë nga analistët, gazetarët, opinionistët e “News 24”, të na thotë cilat janë denoncimet e bëra nga mediat e Irfan Hysenbelliut.

A ka folur Irfan Hysenbelliu dhe mediat e tij për inceneratorët në 7-8 vite apo kanë marrë para prej tyre?

DOKUMENTI-Inceneratorët “blenë” edhe Irfan Hysenbelliun/ Qindra milionë lekë për kompanitë e tij
4 Janar, 10:32

A ka folur Irfan Hysenbelliu dhe ka denoncuar ministra apo kur ka pasur ndonjë shkrim e denoncim ka qenë për hir të interesave të tij?

A e ka sulmuar ndonjëherë Irfani kryeministrin apo e ka trasmetuar live sa herë i ka dashur qejfi?

A ka shkruar ndonjëherë apo raportuar kundër Erion Veliajt apo i duhej për të ndërtuar semaforë dhe trafikndarëse për hotelet e tij në kryeqytet?

Pra, linja editoriale e “News 24”, “Balkan Web”-it dhe “Panoramës”, nuk janë asgjë tjetër thjesht një shërbim që Irfan Hysenbelliu i ka bërë Qeverisë.

Pra, Irfani i shërbente Qeverisë, i bënte reklamë, e të gjitha këto dhe merrte benefitet që i jepeshin.

Dhe ka marrë jo pak. Ka zyrat e televizionit në një pronë publike, ka marrë godinën e konviktit të një shkolle shtetërore dhe e ka kthyer në universitet privat, e kështu me radhë.

Pa folur për ndërtimet që ka bërë në Golem e shumë investime të tjera, që kryesisht kanë lidhje me Qeverinë.

Pra, Irfani ka qenë një shërbetor i paepur i Qeverisë.

Linja editoriale e Irfan Hysenbelliut

Kur një institucion, siç janë tatimet, i çoi një shkresë për të paguar taksat, pasi nuk i paguante prej vitesh, atëherë Irfani iu hodh në fyt.

Irfani e sulmoi, shteti u përgjigj në zbatim të ligjit.

Tani, të dalë një analist, nga këta që rrinë në pishinat e “Prestige Resort” të Irfanit apo nga këta kumarxhijtë e jetës politike shqiptare që mëkohen me para nga Ilir Meta, me paratë e korrupsionit dhe skandaleve të inceneratorëve apo vetë qeverisë dhe aferave të saj e të thotë se cila është linja editoriale e “News 24”-ës, që i ka prishur punë Qeverisë.

Se askush nuk di në këto 9 vite që Irfan Hysenbelliu të ketë qenë kundër kësaj qeverie, gjithmonë ka qenë një ushtar i saj.

Pa folur më tej për faktin se sa ka përfituar ai si individ. Ndoshta këtu është për t’u kitikuar qeveria dhe shteti, pse e kanë lejuar Irfan Hysenbelliun që të mos paguajë taksat dhe të abuzojë me çdo hapësirë që i jep ligji.

Linja editoriale e Irfan Hysenbelliut

Prandaj edhe sulmi ndaj tij, siç e quan Irfani, nuk është ndaj linjës editoriale, por zbatimi i ligjit, lirimi i hapësirave dhe detyrimi për të paguar taksat.

Linjën editoriale aty e ka, po vazhdon 24 orë në 24. Çfarë i prishin pishinat linjës editoriale të Irfanit? Asgjë. Thjesht dhe vetëm Irfani do t’i përdorë ato për të shpëtuar nga "mbytja" e pashmangshme./CNA.al