Sektori i energjisë, në kolaps/ Reformat e Ramës sollën regres

10 Gusht 2022, 11:04, Editorial Florjon Mima

Sektori i energjisë, në kolaps/ Reformat e Ramës sollën

Nëse do të pyesnim kryeministrin, për arritjet e tij më të mëdha, jam i bindur se ndër të parat do të rreshtonte reformën në energjetikë.

Për hir të së vërtetës, pavarësisht se reformë e dobët, e frymëzuar ideologjikisht dhe e pakuptimtë, ajo mund të ketë nje komponent të vetëm reformues, çbërjen e dy fashave tarifore dhe prezantimin e një çmimi të vetëm.

Arsyetimi ishte për të ndaluar që të pasurit të maskohen si të varfër dhe të përfitojnë nga çmimi i ulët i fashës së parë.

Për këtë, që të pasurit të mos maskoheshin si të varfër dhe të paguanin si të varfër, çmimi këtyre u ulet nga rreth 13.5 lekë/këh në 9.5 lekë, ndërsa të varfërve u rritet nga 7,7 në 9,5 lekë.

Pas 9 vitesh do të riprezantohet sistemi dy-tarifor dhe a ua rrok mendja se cili është arsyetimi?

Të pasurit s'mund të paguajnë njëlloj si të varfrit!?

Pra, një reformë që na bëri xhiro si autobusi i unazës dhe na ktheu te stacioni ku u nis.

Vetëm se u deshën më shumë se 9 vjet.

Përveç çmimit, pra, pjesa tjetër është aksion, operacion, që edhe ky nuk rezulton ashtu siç shitet.

Të marrim vetëm një tregues, totalin e borxheve të papaguara të sistemit.

Në vitin 2012 ai ishte 61 miliardë lekë. Borxhe të krijuara në 22-23 vite demokraci.

Po t'ju pyes se sa janë detyrimet sot, me siguri, duke marrë parasysh arrestimet, burgosjet, sekuestrimet, konfiskimet e të tjera masa policore, do të mendoni, me te drejtë, që kjo shifër ka rënë.

Jo! Kontabiliteti nuk të gënjen. Ai thotë se në fund të 202,1 kjo shifër ishte 77 miliardë lekë dhe po të shtojmë edhe rreth 16 miliardë lekë të falura, arrijmë me 93 miliardë lekë ose 52% rritje.

Ky është i vetmi tregues i saktë pasi është kontabël, të gjithë të tjerët janë statistikorë dhe si të tillë kanë marzhe gabimi.

Fuqia e instaluar në hidrocentralet publike është afërsisht 1,4 gigawat.

Fuqia e instaluar e vendit në fund të 2021 arriti në 2,7 giga.

Diferenca është mundi, paraja, djersa, fantazia e investitorëve privatë, si edhe vizioni i një qeverie normale, që bënte gjithçka për suksesin e këtyre investitorëve.

Ndërsa, Qeveria e sotme, pasi uli çmimin e blerjes së energjisë nga operatorët privatë ne 2014, tani i kërcënon se në shtator nuk do t'ua blejë më energjinë.

Me 8,4 leke kwh? Sigurisht, do ta blejë me 700 euro mwh ose 10 herë më shtrenjtë se prodhuesit vendas!?

A ka nevojë Shqipëria për një rafineri për të përpunuar 1-1,5 milionë tonë naftë të sajën?

Legjendat, se një rafineri kushton 1-1,5 miliardë euro duhet t'ia lënë vendin realizmit dhe po ta shpallin interes primar kombëtar, sektori privat mund ta gjejë edhe shumë herë më pak.

Çfarë po bëhet me TEC Vlora? Kur kanë kaluar 10 vite është e papranueshme të mos kesh ndërruar një vidë, të mos kesh riparuar një sistem ftohës, a të kesh bërë gati konvertimin e TEC nga naftë në gaz?

Ç'po bëhet me tubacionin Fier-Vlorë dhe lidhjen e TEC Vlora me infrastrukturën e TAP-it?

Ç'po bëhet me ngritjen e depozitave në kavat kripore të Dumresë? Po me IAP? Po me gazifikimin e vendit? Po me degëzimin për Kosovë?/CNA.al