Vrasjet që po testojnë policinë që duam

23 Korrik 2022, 12:12, Editorial Prof. As. Dr Ervin Karamuço

Policia

Ekziston ende një debat i dendur publik, shpesh ndeshur me paqartësi dhe dilema mbi vrasjet e fundit në Shqipëri. Kjo vihet re sidomos kur fillojmë dhe i etiketojmë vrasësit si profesionist apo thjesht me pagesë. Në fakt ka dallime shumë të mëdha midis dy formave të mësipërme, të cilat duhen kategorizuar sipas kritereve shkencore të profilizimit kriminalistik.

Në çdo vrasje që hetohet, analiza për aftësitë e autorëve bazohet në dy elementë kryesorë që janë teknika dhe taktika e përdorur. Në ngjarjet e fundit të ndodhura në Fushë Krujë dhe Milot, teknikisht autorët kanë qenë qitës të sprovuar, pozicionuar saktë në kuadrat sulmi, kanë zgjedhur armët e duhura, janë të stërvitur për përdorimin e tyre dhe kombinohen për kryqëzime zjarri të mirëmenduara në trajektore. Por nga pikëpamja taktike ka shumë elementë që i profilizojnë të pa rafinuar dhe jo profesionist.

Zgjedhin vende të gabuara për atentate, nxitojnë të gjejnë momentin më të parë, por jo të duhurin, rrezikojnë të pikasen në akset rrugore që përshkojnë dhe lokalizohen lehtësisht në zonat ku djegin automjetet, duke treguar se e njohin mirë zonën, nga ku krijojnë nganjëherë bindjen se janë banor të saj. Në rankimin e Birmingamit këto tipologji organizimi kriminal hyjnë në përgatitje të mesme teknike dhe minimale taktike. Ky përfundim bazuar në manuale empirike shkencore, ka bërë të besojmë se kemi të bëjmë me vrasës me pagesë ose pjesëtar të grupeve rivale, por jo me profesionistë të vërtetë të ardhur nga jashtë apo ish efektivë të stërvitur.

Të parët do e bëjnë më të lehtë zbulimin nga ana e policisë, ndërsa për të dytët do jetë shumë herë më e vështirë. Gjithsesi shpeshtësia e intervaleve të atentateve midis grupeve tashmë të identifikuara rivale krijon më shumë avantazhe për stretegjitë operative të policisë kriminale. Nga ana tjetër, fakti që përballemi me autorë të nivelit mesatar dhe me probabilitet të lartë zbulimi, ka nxjerrë në pah paaftësi dhe dobësi të dukshme, veçanërisht mbi kontrollin e territorit, informacioneve operative, policimit, rrjetit informativ policor dhe integritetit të disa strukturave ligjzbatuese.

Tani më shumë se kurrë kemi sfidën të tregojmë se kemi aftësi policore inteligjente, drejtim strategjik profesionist dhe vullnet për të kaluar në ofensivë për parandalimin e ngjarjeve kriminale dhe rritjen e sigurisë publike. Policia duhet të kuptojë që tashmë ndodhet në mesin e një lufte frontale midis grupeve kriminale, të cilat kanë ndryshuar " modus operandi". Kanë dalë hapur, janë ekspozuar me blinda dhe arsenal armësh, kanë shkathtësi në mbulim dhe humbje gjurmësh, si dhe krijojnë alibi proceduraile të mirëmenduara. Kjo është koha e kthesës së shtetit ligjor, ndryshe do të jetë shumë vonë.