Nuredin Dumani rrëfen tregun e vrasjeve/ DSIK i “dorëzon” edhe sekretet shtetërore

23 Qershor 2022, 15:06, Editorial CNA

Nuredin Dumani rrëfen tregun e vrasjeve/ DSIK i “dorëzon”

Foto ilustruese

Dorian Tola dhe Mark Ndreca përkatësisht, Drejtori i Sigurimit dhe Informacionit të Klasifikuar dhe Drejtori i Drejtorisë së Vettingut të Sigurimit Industrial, dyshohen se janë përgjegjësit kryesorë për pajijsjen me certifikatë sigurie të motrës së Nuredin Dumanit.

Xhuljana Dumani, motra e vrasësit serial, që deri para disa ditësh ishte pjesë e Ministrisë së Jashtme dhe jo në një sektor të rëndomtë, por në zyrën e sekreteve të NATO-s, u pajis lehtësisht nga DSIK me certifikatë sigurie të kategorisë së dytë për “sekrete shtetërore”.

Pavarësisht se ku ka nisur zanafilla e këtij skandali, përëgjegjësit kryesorë janë dy, drejtorët e DSIK-ut.

Në certifikatën e sigurisë për Xhuljana Dumanin janë firmat e tyre. Pra, ata kanë thënë fjalën e fundit, duke vënë në rrezik kështu sigurinë kombëtare dhe sigurinë e NATO-s.

Nuredin Dumani rrëfen tregun e vrasjeve/ DSIK i “dorëzon”

Dorian Tola dhe Mark Ndreca, dhanë “ok”, që sekretet shtetërore të kalonin nëpër duar të Xhuljana Dumanit, në një kohë që vëllai i saj rrëfente krimet monstrueze në SPAK.

Skandali po tentohet të kalohet vetëm me largimin e Xhuljana Dumanit nga Ministria e Jashtme, ndërsa përgjegjësve të vërtetë nuk ju ka hyrë gjemb në këmbë.

As organet hetimore, nuk kanë reaguar, duke e thelluar më tej skandalin.

Mbi çfarë dokumentash DSIK, lëshoi certifikatën e sigurisë për sekrete të NATO-s, për motrën e Nuredin Dumanit?

A firmosën këtë dokument të rëndësishëm Dorian Tola dhe Mark Ndreca, pa marrë informacione nga institucionet përkatëse?

Si ka mundësi që Dorian Tola dhe Mark Ndreca nuk kishin dëgjuar për Nuredin Dumanin, i cili tronditi mbarë opinionin publik, me zbardhjen e tregut të vrasjeve?

Këto janë disa nga pyetjet e mundshme që në fakt, duhej të ishin shtruar nga SPAK dhe jo të mburrej se po lufton krimin e organizuar me sekuestrimin e një autokombajne.

Institucionet si Ministria e Jashtme, DSIK, apo SHISH, kanë rënë ndërsa SPAK është inekzistent.

Certifikata e sigurisë për Xhuljana Dumanin, është provë se si funksionojnë institucionet në vendin tonë.

Bashkë me sigurinë kombëtare dhe sigurinë e NATO-s, u vu në rrezik edhe jeta e Xhuljana Dumanit.

Por, autorët janë të lirë. Dorian Tola dhe Mark Ndreca vijojnë të kenë funksionet që kishin, pa dhënë përgjegjësi ligjore, për përgjegjësi morale as bëhet fjalë./CNA.al