Video-Procedura TAVI/ Doktor Maksi Llambro shpjegon ku dhe si aplikohet

18 Nëntor 2021, 11:00, Aktualitet CNA

Doktor Maksi Llambro ka shpjeguar çfarë është procedura TAVI, ku dhe si aplikohet.

TAVI është procedura mini invazive që aplikohet për trajtimin e stenozës valvulare aortale që njihet si një nga patologjitë më të përhapura të valvulave kardiake dhe që prek afërsisht 3% të popullatës mbi 75 vjeç.

Kjo është një patologji pak e njohur nga pacientët dhe si e tillë ndodh që të nënvlerësohen simptomat e saj shoqëruese.

Stenoza e aortës është një patologji e cila kur paraqitet në formën e saj më të rëndë, që është insuficenca kardiake, ka nje prognozë jo të mirë dhe mortaliteti shkon deri në 50% brenda dy viteve.

Stenoza e aortës është nje patologji e cila diagnostikohet shumë thjesht pra mjafton kryerja e një ekzaminimi ekokardiografik por për fat të keq ndodh që jo gjithmonë pacientëve ju rekomandohet kryerja e një ekzaminimi të tillë.

Prandaj, është e rëndësishme që një pacient i cili paraqet ankesa të tipit: vështirësi në frymëmarrje, dhimbje gjoksi apo humbje të ndjenjave t?i nënshtrohet një ekzaminimi ekokardiografik. Mosdiagnostikimi në kohë i kësaj patologjie bën që pacientët të diagnostikohen në stade të avancuara të sëmundjes gjë që con në shtrimin e tyre në spital në gjendje të rëndë dhe me indikacion për ndërhyrje kirurgjikale me qëllim zëvëndësimin valvular.

Procedura mininvazive, Tavim është një nga dy teknikat që aplikohen për zëvendësim të valvulës së aortës dhe realizohet me ndihmën kateterëve pra ndryshe nga kirurgjia konvencionale nuk bëhet me hapje të kraharorit, gjatë proçedurës nuk ndalohet zemra dhe pacienti nuk ka nevojë për anestezi të përgjithshme apo intubim. Kjo procedurë realizohet duke bërë një shpim në një arterie periferike, kryesisht atë femorale, dhe pas vendosjes së kateterit në aortë bëhet e mundur kalimi dhe pozicionimi i një valvule biologjike në nivel të valvulës së aortës së sëmure.

Proçedura zgjat afërsisht një orë, proçedurë gjatë së cilës pacienti është zgjuar pra koshient. Pas proçedurës pacienti nuk ka nevojë të qëndrojë në Terapi Intensive, arrin të mobilizohet 1 ditë pas proçedurës dhe pas 3-4 ditë hospitalizim pacienti mund të largohet për në shtëpi./CNA.al