web counter
LEXO PA REKLAMA!

SHKARKO APP

App Store
Google Play

“Triathlon Pogradec 2026”/ Liqeni i Ohrit sfidon atletët e parë të triatlonit në qytetin liqenor

22 Qershor 2026, 14:10, Qyteti im CNA

Pogradeci u kthye këtë të diel në një arenë të madhe sportive, ku për herë të parë zhvilloi një garë triatloni në ujërat dhe rrugët e qytetit. “Triathlon Pogradec 2026” solli në zemër të qytetit, me qendër aktiviteti sheshin "Odeon", rreth 100 atletë nga Shqipëria dhe rajoni, ndërsa qindra qytetarë dhe sportdashës ndoqën nga afër sfidën e veçantë.

Gara nisi në orën 09:00 me disiplinën e notit në ujërat e Liqenit të Ohrit, një prej segmenteve më sfiduese për sportistët. Më pas, atletët vijuan garën me biçikletat në rrugët e Pogradecit dhe zonave përreth, për ta mbyllur me disiplinën e vrapimit, në një përballje që kërkonte përgatitje fizike, qëndrueshmëri dhe përqendrim maksimal.

Triatloni u zhvillua në dy kategori kryesore, Sprint dhe Olimpik, si në garat individuale, ashtu edhe në formatin ekipor “Relay”, duke sjellë në Pogradec sportistë të moshave të ndryshme, nga të rinj 13-vjeçarë deri te veteranë të këtij sporti.

Organizatori i “Triathlon Pogradec”, Julian Lekoçaj, thotë se zgjedhja e qytetit liqenor nuk ishte rastësore, pasi natyra dhe terreni ofrojnë të gjitha kushtet për zhvillimin e një eventi të tillë.

“Triathlon Pogradec 2026”/ Liqeni i Ohrit sfidon atletët e

“Jemi në Pogradec sepse Pogradeci është i bekuar nga natyra dhe i ka të gjitha kushtet e favorshme për të organizuar një garë triatloni. Kemi ardhur për herë të parë me edicionin “Triathlon Pogradec”, me synimin që ta kthejmë në një traditë të përvitshme dhe ta shtojmë përkrah eventeve të tjera që zhvillohen në Tiranë, Shkodër dhe Himarë. Në këtë garë marrin pjesë mbi 100 sportistë, të cilët konkurrojnë në dy kategori: Olimpik dhe Sprint. Kemi ardhur për ta zgjuar pak Pogradecin edhe në aspektin sportiv, jo vetëm me garat e vrapimit, por edhe me një disiplinë të veçantë si triatloni. Ndoshta në të ardhmen mund të organizojmë edhe një garë të tipit 'Ironman'".

Për sportistët pjesëmarrës, sfida në Pogradec ishte një eksperiencë e veçantë, jo vetëm për vështirësinë e garës, por edhe për natyrën dhe atmosferën që ofroi qyteti. Sportisti nga Kosova, Albion Ymeri, e cilësoi garën një përvojë të bukur dhe një hap të rëndësishëm për zhvillimin e triatlonit në Pogradec.

“Triathlon Pogradec 2026”/ Liqeni i Ohrit sfidon atletët e

“Gara ishte e vështirë, por shumë e bukur. Pogradeci është një qytet shumë i bukur dhe fakti që po organizohet një triatlon këtu është diçka e jashtëzakonshme. Unë vij nga Kosova. Triatlone më parë nuk ka pasur në Pogradec, por kanë qenë garat e vrapimit dhe gjysmëmaratona e Pogradecit. Për triatlon është hera e parë. Kishim shumë sportistë të përgatitur. Me Gencin stërvitemi bashkë dhe jemi pak a shumë në të njëjtin nivel. Kështu vendosëm që njëri të garonte në Sprint dhe tjetri në kategorinë Olimpike, ndaj në fund mbetëm të dy të kënaqur. Klima është shumë e mirë. Është pothuajse e ngjashme me atë të Prishtinës. Lartësia mbidetare është e përafërt dhe ne stërvitemi në kushte të tilla, ndaj nuk ishte diçka ndryshe për ne.”

Edhe për triatletin nga Prishtina, Genci Isufi, organizimi i parë i këtij lloji në Pogradec ishte një sukses, ndërsa ai vlerësoi veçanërisht atmosferën dhe kushtet e garës.

“Triathlon Pogradec 2026”/ Liqeni i Ohrit sfidon atletët e

“Unë profesion e kam triatlonin, jam triatlet. Gara ishte fantastike dhe, duke marrë parasysh që është organizimi i parë i një triatloni këtu në Pogradec, mund të them se ka pasur një organizim perfekt. Pjesa e notit ka qenë normalisht pak më e vështirë për mua, por pjesa e biçikletës dhe ajo e vrapit ishin fantastike. Unë vij nga Prishtina. Kam rreth 4-5 vite që merrem me sportin e triatlonit, ndaj edhe e konsideroj veten si triatlet.”

Mes pjesëmarrësve ishte edhe 19-vjeçari nga Selaniku, Andon Senka, i cili e provoi për herë të parë një garë triatloni në Pogradec dhe e vlerësoi veçanërisht segmentin e notit dhe pamjen e liqenit.

“Triathlon Pogradec 2026”/ Liqeni i Ohrit sfidon atletët e

“Unë jam Andon Senka, jam 19 vjeç dhe vij nga Selaniku. Erdha këtu në Pogradec për të marrë pjesë në këtë garë. Ishte pak e vështirë. Noti ishte shumë i bukur, po ashtu edhe pjesa me biçikletë. Pamja e liqenit është shumë e bukur. Te vrapi e ngatërrova pak rrugën, por në përgjithësi ishte shumë mirë. Nuk është hera e parë që marr pjesë në triatlon, por është hera e parë që garoj në Pogradec. Kam marrë pjesë edhe në gara të tjera. Kam dalë i dyti në Greqi dhe jam nënkampion në Greqi. Jam shumë i kënaqur dhe shumë i lumtur. Edhe koha ishte shumë e mirë.”

Për vrapuesin dhe maratonistin pogradecar, Dorian Hoxhallari, evente të tilla janë një mënyrë për të promovuar sportin dhe për të afruar më shumë të rinjtë drejt një stili jetese aktive.

“Triathlon Pogradec 2026”/ Liqeni i Ohrit sfidon atletët e

"Bëra distancën Sprint i vetëm, me kohë 1 orë e 21 minuta. Sigurisht, Pogradeci nuk zhgënjen asnjëherë, qoftë me natyrën, qoftë me mikpritjen, qoftë me organizimin. Ishte një garë fantastike, çdo gjë shkoi shumë mirë dhe besoj se të gjithë jemi të kënaqur. Ne mundohemi gjithmonë të promovojmë sportin. Sigurisht, rinia është paksa neglizhente, por përmes eventeve dhe mesazheve që përcjellim, përpiqemi të angazhojmë sa më shumë të rinj drejt sportit dhe një jetese të shëndetshme."

Me përfundimin e kësaj gare të parë, “Triathlon Pogradec 2026” synon të mos mbetet vetëm një aktivitet sporadik, por të kthehet në një takim të përvitshëm për sportistët vendas dhe të huaj. Përtej garës dhe konkurrencës, ky aktivitet solli një tjetër mënyrë për të promovuar qytetin liqenor, duke ndërthurur sportin, turizmin dhe bukurinë natyrore të zonës.

Pjesëmarrja e atletëve nga vende të ndryshme të rajonit dhe më gjerë tregon interesin në rritje për zhvillimin e disiplinave të tilla edhe jashtë qendrave tradicionale sportive. “Triathlon Pogradec 2026” u mbyll me suksesin e një edicioni të parë, por me ambicien që në vitet e ardhshme gara të zgjerohet më tej, të ketë më shumë pjesëmarrës dhe të shndërrohet në një nga aktivitetet më të rëndësishme sportive që zhvillohen në qytetin e Pogradecit./ CNA





Lajmet e fundit nga