Festivali Kombëtar i Sazeve rikthen tingujt e traditës në Kolonjë

22 Qershor 2026, 09:55, Qyteti im CNA

Për dy net me radhë, në Leskovik dhe Ersekë është mbajtur Festivali Kombëtar i Sazeve, ku grupe folklorike nga gjithë Shqipëria performuan këngët dhe vallet tradicionale.

Një festival që është kthyer në traditë tanimë e që organizohet për të disatin vit radhazi në Kolonjë, synon të mbajë gjallë vlerat kulturore dhe artistike të krahinave të ndryshme.

"Ky është edicioni i 14-të i Festivalit Tipologjik Folklorik të Sazeve Popullore. Këtë vit marrin pjesë 12 grupe, marrin pjesë edhe dy grupe të tjera përshëndetëse. Kemi 'Valët e Liqenit' që vjen nga Struga e një grup përshëndetësish nga Kosova. Festivali synon promovimin e trashëgimisë jomateriale dhe promovimin e Sazeve Popullore. Meriton që jo vetëm të ruhet, por edhe të trashëgohet në brezat e rinj", tha Erilda Selaj, drejtoresha e Qendrës Kombëtare të Veprimtarive Tradicionale.

Artistët e mirënjohur, të cilët i përkasin skenës së muzikës popullore prej më tepër se 30 vitesh, tregojnë se ky festival u bën një nder të madh sazeve, pasi fokusi kryesor ngelet trashëgimi nga një brez te tjetri.

"Instrumenti është gjëja më e dashur. Unë luaj lahutë, kitarë, buzuk. Nga viti 1976, që kur më mori Lulushi, atëherë nisa pasionin. Ka të rinj që po luajnë, por nuk luajnë tabanë. Po vazhdojnë dhe po e ripërtërijnë".

"Unë kam që në rini që u aktivizova me grupin e Gramshit, kemi marrë pjesë në festivale ballkanike. Në trevat tona kjo ruhet edhe në brezat më të rinj, por fatkeqësisht një pjesë e rinisë janë larguar e është fatkeqësi për ne, por e kanë ruajtur atje ku janë, në emigrim".

"Ky festival padyshim është kujtesë e thelluar e muzikës dhe artit tonë të trashëguar, e cila shpaloset në këtë skenë që është privilegj i artistëve. Është festival që përveç kulturës sonë popullore që i ka me shekuj, trashëgohet brez pas brezi".

Përmes tingujve të sazeve, valleve dhe këngëve që mbartin historinë e krahinave shqiptare, Festivali Kombëtar i Sazeve në Kolonjë riktheu edhe një herë vëmendjen te pasuria e trashëgimisë sonë shpirtërore. Një traditë që synon të mos mbetet vetëm kujtim i së shkuarës, por të përcillet te brezat e rinj si identitet, kulturë dhe krenari kombëtare./ CNA