E fundit!

19:17 Aktualitet

Shtrëngohen masat për shoferët/ Kuvendi miraton ndryshimet në Kodin Rrugor

Kuvendi ka miratuar projektligjin e propozuar për ndryshim...

"Të rënë nga vaktet"/ Rama ironizon VIP-at në protestë: Të fryrët me botokse "llajkesh e follouersash"

18 Qershor 2026, 14:45, Politikë CNA

"Të rënë nga vaktet"/ Rama ironizon VIP-at në

Kryeministri Edi Rama ka bërë një tjetër reagim në lidhje me protestat që po zhvillohen në vend.

Me anë të një postimi në "X", Rama shkruan se disa persona po e shesin rezolutën e PE-së si fitoren e tyre. Rama thotë se amendamenti i miratuar nuk ka lidhje me Zvërnecin, por me zonën e mbrojtur Vjosë-Nartë.

Në reagimin e tij, Rama është ndalur edhe te rishikimi i ligjit për zonat e mbrojtura, për të cilin tha se është pjesë e agjendës së negociatave dhe do të identifikohet çdo pikë që nuk përputhet me standardet e BE-së.

Rama ka ironizuar sërish VIP-at pjesë e protestës, të cilëve u është referuar si ata të fryrët me botokse "llajkesh e follouersash".

Reagimi i Ramës

Disa tam-tamxhinj me emër që kujtuan se u bë deti kos për lugët e tyre të ndryshkura, u thonë flamingove se rezoluta e djeshme e Parlamentit Europian na qenkej fitorja e tyre e parë!

Në fakt e vërteta është se flamingot fitoren e kanë pasur në xhep pa nisur protesta, pavarësisht se nuk duan ta shohin pasi po shijojnë sfilatën e bukur në bulevard mes sorrave, korbave e llapaqorrave, sepse sa të jemi unë dhe Partia Socialiste mbrojtja e mjedisit dhe zhvillimi në harmoni me natyrën në zonat me ndjeshmëri të veçantë, është prioritet i padiskuteshëm.

Sa për “fitoren” e parë janë të keqinformuar nga sorrat dhe korbat, sepse amendamenti i “fitores” u rrëzua, ndërsa amendamenti i miratuar nuk ka asnjë lidhje me Zvërnecin, pra me peizazhin e mbrojtur Pishë Poro - Nartë, po shprehimisht me zonën e mbrojtur Nartë - Vjosë ku qeveria ndan absolutisht të njëjtin qëndrim me europarlamentarët. Dhe kjo nuk është lojë fjalësh me emra vendesh, po është e vërteta e fakteve që burojnë nga dokumentacioni teknik zyrtar, jo nga kanalet sociale.

Ndërsa lidhur me rishikimin e ndryshimeve në ligjin për zonat e mbrojtura, europarlamentarët do të informohen se ai është pjesë e agjendës së negociatave dhe si i tillë do të jetë fillimisht në një proces analitik me Komisionin, ku do të identifikojmë çdo pikë që nuk përputhet me kriteret e standardet e BE-së.

Thënë sa më lart, rishikimi i konceptit “fitore” do të ndihmonte sidomos VIP-at e rënë nga vaktet politike dhe ata të fryrët me botokse llajkesh e follouersash, që pas përshirjesh me epsh në nxitjen e histerisë digjitale, të gatiteshin për një zgjim pa dhimbje të papërballueshme zhgënjimi nga fundi i revolucionit imagjinar.