E fundit!

11:13 Aktualitet

Eskortat e burgjeve në protestë/ Dalin emrat “VIP” që mbështesin tubimin

Prej disa ditësh, një valë e re protestash ka nisur duke m...

Tallja skandaloze e Sokol Sadushit dhe KED me miliardat që u paguhen si rrogë

18 Korrik 2025, 14:25, Editorial CNA

Sokol Sadushi

Pak ditë kanë kaluar nga dita kur KED, e drejtuar nga Sokol Sadushi, njoftoi se aplikimet për vendin vakant të Gjykatës Kushtetuese, organi emërtues i të cilit ishte Kuvendi i Shqipërisë, duhej të rihapeshin.

Sipas njoftimit, meqë në garë ishin vetëm 2 kandidatë dhe nuk ishte arritur numri limit prej 3 kandidatësh, duhej të rihapeshin aplikimet.

Por e vërteta nuk është kështu!

Nga 10 kandidatura, numri i kandidatëve zbriti në 4. Mes atyre që dolën nga gara kishte që u dorëhoqën rrugës ose që u skualifikuan nga KED. Por megjithatë kishin mbetur ende 4 kandidatura. Mes tyre edhe ish-kryetarja e KLGJ-së, Naureda Llagami.

Zonja Llagami njihet për miqësinë me Klotilda Bushkën, kryetaren e famshme të Komisionit të Ligjeve që i kishte shndërruar zyrat e shoqeve që paguhen me rroga shteti, në ambiente presioni në mbrojtje të familjes Xoxa-Veliaj.

Nëse hap dhe lexon procesverbalin e mbledhjes së KED motivi dhe justifikimi që Sokol Sadushi i jep dështimit të "garës" është skandaloz.

Sipas Sadushit, profesor i së drejtës administrative, gara kishte mbetur vetëm me 2 kandidatë sepse... 2 të tjerët ishin ende në proces verifikimi!

Domethënë 2 kandidatura (mes tyre ajo e Llagamit), ishin ende duke u verifikuar, ndaj meqë KED kishte verifikuar vetëm 2 atëherë mbeteshin vetëm 2 në garë. E meqë ligji kërkon 3, dhe 2 janë më pak sesa 3, atëherë nuk bëhen dot 3 që t'i përcillen Kuvendit që ky i fundit të zgjedhë.

Pra, kanë mbetur 2 në garë, por ndërkohë "2 janë ende në proces verifikimi". Në teori thotë Sadushi janë 4, po në praktikë janë 2. Pra, kemi 4, por që të mbeten 2, nuk po i verifikojmë tani 2. E meqë pastaj nuk do të kemi 3 siç e kërkon ligji duhet të rihapim garën.

Ky është profesori i së drejtës administrative, Sokol Sadushi, që i zgjidh çështjet administrative me stilin 4-2=2.

Po pse nuk tha 0? Fundja në dorë e ka!

Kandidatura kishte 30, por meqë të gjitha janë në proces verifikimi, kemi 0 emra për Kuvendin, ndaj duhet të rihapet gara derisa Sadushit t’i dalin llogaritë.

Ndërkohë që s’i propozime për Gjykatën kushtetuese, Sadushi po i bën kontroll Genta Bungës, Kuvendit i thotë të rihapë garën se nga 4 kandidatura të mbetura, vetëm 2 ka verifikuar Sadushi.

A do të na e nderojë Sokol Sadushi Gjykatën Kushtetuese me Genta Bungon?
17 Korrik, 13:43

Interesante është që edhe motivet që janë përdorur për të skualifikuar 4 nga 6 kandidaturat (përveç 2 kandidatëve që kanë dhënë dorëheqjen).

Meqë Sadushi e mban veten si profesor i së drejtës administrative, ata kandidatë që nuk i pëlqenin i ka pushkatuar njëri pas tjetrit me arsye administrative. Klasike apo jo? Kështu do të shkojnë të ankohen në Gjykatën Administrative.

Dhe kur njëra prej kandidateve paskësh ankimuar vendimin, apeli administrativ ia kishte trajtuar e dhënë vendimin në më pak se një muaj. Dhe thonë pastaj që gjyqet zgjasin me vite.

Lajmi këtu është që Sadushi e paska futur në xhepin e pantallonave Apelin Administrativ.

Pazari për atje kalon nga profesor Sadushi. Lajmi tjetër është që ish-kryetarja e KLGJ-së nuk u verifikuaka dot për t'u kualifikuar si kandidaturë për KED.

Kjo është tallja skandaloze e Sokol Sadushit dhe marionetave të tij kudo në sistemin që shqiptarët e paguajnë miliarda në vit. Pa folur për të tjerat që mbase duhen për të marrë drejtësi.

Në teori kemi sistem drejtësie të reformuar, në praktikë kemi Sadushin./ CNA