Messi s’ka ndërmend të ndalet, rekordet që synon në Botëror

21 Qershor 2026, 13:07, Sport CNA

Messi s’ka ndërmend të ndalet, rekordet që synon në

Lionel Messi vazhdon të jetë në qendër të vëmendjes në Kupën e Botës, por jo vetëm për atë që po bën në fushën e lojës. Kapiteni i Argjentinës po kalon një periudhë delikate edhe në aspektin personal, pasi babai i tij, Jorge Messi, raportohet se po përballet me probleme serioze shëndetësore.

Në ditët e fundit, situata u bë edhe më e ndërlikuar pas qarkullimit të një lajmi të rremë se Horge Mesi kishte ndërruar jetë. Informacioni u përhap me shpejtësi dhe krijoi reagime të shumta, përpara se të përgënjeshtrohej.

Pavarësisht vështirësive personale dhe zhurmës së krijuar jashtë fushës, Lionel Messi ka vazhduar normalisht përgatitjet me kombëtaren argjentinase. Sulmuesi vijon të stërvitet me grupin dhe të jetë pjesë aktive e planeve të trajnerit Lionel Scaloni për vazhdimin e turneut.

Një faktor i rëndësishëm për Argjentinën mbetet edhe atmosfera brenda skuadrës. Bërthama e grupit aktual ka luajtur së bashku për shumë vite dhe ka ndërtuar një marrëdhënie të fortë si brenda ashtu edhe jashtë fushës. Këta futbollistë fituan Kupën e Botës në Katar, dy edicione të Kupës së Amerikës dhe trofeun Finalisima, duke krijuar një grup të konsoliduar dhe me përvojë të konsiderueshme ndërkombëtare.

Në këtë skuadër, Messi vazhdon të jetë figura qendrore. Përvoja, roli i tij në lojë dhe ndikimi te grupi e mbajnë atë në qendër të projektit të Argjentinës. Bashkëlojtarët e konsiderojnë liderin e skuadrës dhe një pikë referimi në objektivat e përbashkëta të kombëtares.

Ndërkohë, edhe në aspektin statistikor, Messi po zhvillon një turne shumë pozitiv. Pas ndeshjeve të para të Botërorit, ai kryeson listën e golashënuesve me tre gola, së bashku me sulmuesin David të Kanadasë. Në të njëjtën kohë, argjentinasi ka arritur në kuotën e 16 golave në historinë e Kupës së Botës, duke barazuar rekordin e Miroslav Klose.

Kjo do të thotë se në ndeshjet e ardhshme ai ka mundësinë të vendosë një rekord të ri absolut në historinë e turneut. Gjithashtu, ekziston mundësia që për herë të parë në karrierën e tij të fitojë edhe titullin e golashënuesit më të mirë të një edicioni të Kupës së Botës.

Tani vëmendja e Argjentinës është përqendruar te sfida e ardhshme kundër Austrisë. Kampionët në fuqi kërkojnë të vazhdojnë me rezultate pozitive, ndërsa Mesi synon të shtojë statistikat e tij personale dhe të ndihmojë skuadrën drejt fitimit të trofeut.