Amorim nis nga puna, zbulohen të paprekshmit te Milani

21 Qershor 2026, 14:11, Sport CNA

Ruben Amorim ka nisur zyrtarisht aventurën e tij në krye të Milanit dhe sinjalet e para tregojnë se trajneri portugez ka ide të qarta për mënyrën se si dëshiron të ndërtojë skuadrën për sezonet e ardhshme. Edhe pse ka vetëm pak ditë në detyrë, ai ka nisur lëvizjet e para për të konsoliduar bazën e projektit teknik kuqezi.

Sipas raportimeve nga Italia, Amorim ka zhvilluar kontakte me dy prej futbollistëve më të rëndësishëm të Milanit, Mike Maignan dhe Adrien Rabiot, të cilët aktualisht ndodhen me kombëtaren franceze në Kupën e Botës. Qëllimi i bisedave ka qenë t’u transmetojë lojtarëve besimin e tij dhe t’i bindë se klubi dëshiron t’i ketë në qendër të projektit të ri.

Situata e Maignan ka qenë prej muajsh objekt diskutimesh në merkato. Portieri francez është përmendur shpesh në lidhje me interesimin e disa klubeve të mëdha evropiane.

Për këtë arsye, Amorim ka vendosur të komunikojë personalisht me gardianin francez. Në vizionin e trajnerit portugez, portieri nuk ka vetëm detyrën për të mbrojtur portën, por luan një rol të rëndësishëm edhe në ndërtimin e aksioneve nga mbrojtja. Pikërisht për këtë arsye, Menjo konsiderohet një nga figurat kryesore të skuadrës.

Një tjetër çështje e rëndësishme lidhet me Adrien Rabiot. Mesfushori francez ka qenë pjesë e diskutimeve të shumta në javët e fundit. Amorim ka dashur të largojë çdo paqartësi, duke i shpjeguar futbollistit rolin që parashikon për të në skemën e re taktike.

Sipas ideve të trajnerit, mesfusha duhet të ketë intensitet, forcë fizike, aftësi për të mbuluar hapësirat dhe personalitet në momentet kyçe të ndeshjeve. Në këtë profil, Rabiot konsiderohet një nga lojtarët më të përshtatshëm për të udhëhequr repartin. Gjatë bisedës, Amorim i ka paraqitur planet e tij dhe rëndësinë që francezi do të kishte në organizimin e lojës së Milanit.

Ndërkohë, trajneri portugez ka nisur më herët kontakte edhe me Strahinja Pavloviç, një tjetër futbollist që konsiderohet i rëndësishëm për të ardhmen e skuadrës. Kjo tregon se drejtuesit dhe stafi teknik po punojnë për të ruajtur bërthamën e grupit përpara se të fokusohen te afrimet e reja në merkato.

Mbështetja e drejtuesve ndaj Amorim duket e plotë. Klubi synon të ndërtojë një projekt afatgjatë dhe të rikthehet konkurrues në nivelet më të larta, si në kampionat ashtu edhe në kompeticionet evropiane. Për këtë arsye, prioriteti i parë mbetet ruajtja e lojtarëve që konsiderohen shtyllat e skuadrës.

Në pritje të zhvillimeve të merkatos, Amorim ka bërë tashmë lëvizjet e para për të forcuar raportin me liderët e grupit.