E fundit!

12:49 Politikë

Reforma Territoriale/ Berisha, thirrje qytetarëve për protestë

Kreu i PD-së Sali Berisha në një bashkëbisedim me qytetarë...

Buzëqeshje dhe trofetë e parë në jetë/ "Maratona e Bebeve" ndez atmosferën në Pogradec

25 Korrik 2026, 11:22, Qyteti im CNA

Buzëqeshje dhe trofetë e parë në jetë/ "Maratona e

Salla e pallatit të sportit "Arefi Berberi" në Pogradec u mbush me buzëqeshje, duartrokitje dhe emocione të veçanta. Mbi 90 vogëlushë morën pjesë në edicionin e tretë të "Maratonës së Bebeve", një aktivitet që tashmë është kthyer në një traditë të dashur për qytetin liqenor.

Nën organizimin e Bashkisë Pogradec dhe shoqatës "Maraton Albania", gara ruajti të gjitha standardet e një sfide të vërtetë atletike, ku çdo pjesëmarrës i vogël u pajis me numër gare dhe çip matës. Për organizatorin Leonard Peço, rikthimi në Pogradec ka gjithmonë një domethënie të veçantë.

"Të rikthehesh në Pogradec pa diskutim është një ndjenjë e veçantë dhe është një kënaqësi. Është pikërisht ky vend ku neve si Shoqatë Marathon Albania na u dha mundësia për të bërë një garë internacionale dhe rikthehemi në edicionin e pestë dhe krenarisht mund të themi se ia kemi dalë për të kthyer një ëndërr në realitet. Sot ishte edicioni i tretë i 'Maratonës së Bebeve', ku na dhanë dhe na dhuruan emocione pafund. Ishte një supersfidë e fëmijëve sigurisht, por dhe një përgjegjësi nga ana jonë për të gjetur realisht më të mirat. Për hir të së vërtetës, 'Maratona e Bebeve' ka lindur në Pogradec dhe vazhdon ta ruajë traditën po këtu në Pogradec. Ishin rreth 90 fëmijë pjesëmarrës, nga të cilët u laureuan të gjithë me medalje, të gjithë me një numër gare të improvizuar dhe me çip. Pra, ishte një garë e rregullt dhe pa diskutim për fituesit e çdo grupmoshe kishim edhe kupa të dedikuara."

Të gjitha bebet dhe fëmijët pjesëmarrës u shpërblyen me medalje për mundin e tyre, ndërsa më të shpejtët e çdo grupmoshe morën edhe kupa dedikuar fitores. Për prindërit, kjo ditë do të mbetet gjatë në memorie. Shumë prej tyre nuk i fshehën emocionet dhe krenarinë për trofeun e parë në jetën e vogëlushëve të tyre.

"Maratona e Bebeve" dëshmoi edhe një herë se sporti dhe aktiviteti fizik nuk njohin moshë, duke dhuruar një festë të vërtetë familjare në zemër të Pogradecit. CNA