Banorët e Vërdovës kundër projektit për lumin në Unazë/ Kërkojnë sistemim të shtratit dhe ruajtjen e urave

1 Korrik 2026, 12:49, Qyteti im CNA

Banorët e fshatit Vërdovë kundërshtojnë projektin për sistemimin e lumit në zonën e Unazës, i dëmtuar nga përmbytjet e nëntorit të vitit të kaluar.

Gjatë dëgjesës së zhvilluar me përfaqësues të Bashkisë Pogradec, ata kanë ngritur shqetësimin se ndërhyrjet e parashikuara mund të vështirësojnë aksesin drejt banesave të tyre.

Banorët kërkojnë që ndërhyrja të fokusohet në pastrimin dhe zgjerimin e shtratit të lumit, forcimin e mureve mbrojtëse dhe rikonstruksionin e infrastrukturës ekzistuese, duke ruajtur urat që lidhin banesat me rrugën kryesore.

“Problemi ynë është që urat të rrinë siç janë dhe të rregullohet lumi. Të bëhet muri matanë, të forcohet edhe këtej, të zgjerohet dhe të bëhet i fortë. Ne nuk jemi dakord me këtë projekt që kanë bërë. Kërkojmë të zgjerohet, të pastrohet dhe të shtrohet”, tha një banor.

Sipas tyre, zgjidhja e propozuar me një hapësirë kalimi prej rreth një metër e gjysmë nuk u garanton lëvizjen normale, veçanërisht për familjet që kanë persona të sëmurë apo të moshuar.

“Si do të kaloj unë me atë një metër e gjysmë që do të futem në shtëpi me të sëmurë, paralizuar?! Ne kërkojmë të sistemohet lumi, të betonohet dhe urat të mbeten siç janë, që të komunikojmë me shtëpitë tona dhe të futim makinat e mjetet bujqësore”, u shpreh një tjetër banor.

Banorët thonë se problematika e lumit është e hershme dhe prej dekadash nuk ka marrë një zgjidhje përfundimtare. Ata kërkojnë ndërtimin e mureve mbrojtëse në të dyja anët e lumit dhe ndërhyrje në shtratin e tij për të shmangur përmbytjet e ardhshme.

“Kemi 30 vjet me këtë lumë që vuajmë kështu. Duam që kjo punë të bëhet e saktë. Të bëhen dy mure të plota, të zgjerohet dhe pastrohet fundi i lumit, që edhe ne të kemi mundësi të kalojmë”, tha banori.

Nga ana tjetër, këshilltari i pavarur në Bashkinë Pogradec, Arbër Male, u shpreh se nga konsultimi rezultoi se një pjesë e banorëve nuk kanë pasur informacion të plotë mbi projektin dhe kërkojnë një zgjidhje përfundimtare.

“Banorët janë të painformuar sa i përket projektit të sistemimit të lumit. Ata kërkojnë sistemimin e ujërave të zeza, thellimin e shtratit të lumit dhe një zgjidhje përfundimtare për prurjet që vijnë nga mali. Shpresoj që të gjendet një rrugë e përbashkët mes banorëve dhe bashkisë dhe propozimet e tyre të merren në konsideratë”, u shpreh Male.

Dëgjesa përfundoi pa një dakordësi përfundimtare, ndërsa banorët kërkojnë që shqetësimet e tyre të reflektohen në projekt përpara nisjes së punimeve./CNA