web counter
LEXO PA REKLAMA!

SHKARKO APP

App Store
Google Play

Hajduti që kërkon lirinë me propagandë

15 Mars 2025, 16:39, Editorial CNA

Hajduti që kërkon lirinë me propagandë

“Jam hajdut me 250 mijë vota dhe duhet të jem i lirë, apo sa të më provohet hajdutëria unë duhet të qëndroj në shtëpi, s’kam pse qëndroj në burg, sepse unë jam zgjedhur kryetar bashkie”.

“Sa të më provojnë hajdutllëkun, edhe pse kam 9 raste, prokurorët pa vendim gjykate nuk mund të më mbajnë në burg”.

Këto janë pak a shumë qëndrimet e kryebashkiakut të Tiranës, i cili në mënyrë të vazhdueshme kërkon lirinë e tij dhe pretendoi në seancën e fundit gjyqësore në Apelin e GJKKO-së se duhet të ndiqej në gjendje të lirë apo në arrest shtëpie, solli dhe avokatë nga Amerika që na u kthyen në vëzhgues dhe pastaj ngelën jashtë dere.

Tani termat e përdorur nga kryebashkiaku janë ata të mësipërmit, pra meqenëse ky është votuar nga 250 mijë qytetarë të Tiranës që kanë marrë pjesë në votim, në fakt se Erioni ka marrë rreth 150 mijë vota, do të ndiqet në gjendje të lirë se do të jetë në krye të punëve të Bashkisë së Tiranës.

Por pse një zyrtar hajdut që është drejtor si ata kolegët e Erionit të dosjes “5D”, se Erioni është kryetari i organizatës së dosjes “5D” se ka thënë jam kryetar i organizatës së këtyre drejtorëve. Këta drejtorët pse duhet të rrinë në burg? Apo këta ishin drejtorë të pazgjedhur? Në fakt këta i kishte zgjedhur Erioni.

Ky që zgjidhet me vota nuk duhet të rrijë në burg. Ky duhet të rrijë në krye të bashkisë, të vazhdojë punën, që të vazhdojë të vjedhë akoma apo që të prishë provat siç e kanë kapur prokurorët.

Pra, një logjikë që mund ta ketë dikush që jeton në një univers tjetër dhe mesa duket Erion Veliaj jeton në një univers paralel se në këtë që jetojnë njerëzit e zakonshëm dhe në atë sistem drejtësie që ka Shqipëria me ligje të ndryshuara, sipas kryeministrit, me vullnetin e Noc Rrokut, pra ishte vetë kryeministri, se nuk kishte vullnet tjetër. Llogaria del se Erion Veliaj nuk i do këto ligje, por do të shpikë të tjera.

Pra meqenëse je zyrtar i zgjedhur edhe kur je hajdut ti nuk mund të arrestohesh, nuk mund të rrish në burg, duhet të rrish i lirë derisa të të dënojë gjykata, por kur prish provat?! Kryebashkiaku i Tiranë pas hekurave, në burgun e Durrësit dhe ka bërë sulme kriminale ndaj mediave, gjyqtarëve e prokurorëve dhe sjelljes së tyre dhe qasjes institucionale, imagjinoni të ishte i lirë ky individ.

Ky që shkoi para SPAK-ut dhe tha jam krenar për këtë institucion, që tha jam krenar për kolegët dhe tani përdor skema dhe skenarë nga më manipuluesit, jo thjesht ndaj prokurorëve dhe gjyqtarëve, por dhe për të ngritur pseudokauza në opinionin publik se vallai ia kanë futur, se vallai është një organizatë në hije që e ka marrë më qafë, kur vetë na tha se ndaj tij nuk kishte hetim, kur vetë na tha se po hetohej pak Ajola e kështu me radhë.

Në fakt, sipas vendimit të GJKKO-së janë 9 raste korrupsioni dhe të tjerat që mund të gjenden rrugës tani gjatë hetimeve sepse hetimet vazhdojnë.

Ndaj pyetja që shtrohet është: pse Erion Veliaj duhet të ndiqet i lirë, se është i zgjedhur dhe kur zgjidhesh me vota nuk mund të rrish në burg?!

Por populli e ka zgjedhur Erion Veliajn duke menduar se mund t’i bëjë mirë punët e Bashkisë Tiranë, t’i menaxhojë, t’i drejtojë dhe jo të marrë paratë e qytetarëve dhe pastaj të firmosë urdhër-pagesa për kompani të ndryshme të cilat më pas i përfundojnë paratë në xhepat e bashkëshortes së tij, se nuk ka qytetar që e ka zgjedhur për këtë gjë.

Ndaj teza se Erion Veliaj duhet të ndiqet i lirë dhe nga propaganda e shfrenuar e një tufe gazetarësh të kapur në përgjime, të kthyer në vasalë, të keqpërdorur nga një telefon burgu, nuk është as më shumë e as më pak sesa një ironi e pështirë që vjen nga tezat e komanduesit të burgut te propagandistët që bëjnë sikur nuk kuptojnë se hajduti është hajdut, qoftë dhe i zgjedhur, dhe vendin e ka pas hekurave./ CNA





Lajmet e fundit nga