web counter
LEXO PA REKLAMA!

SHKARKO APP

App Store
Google Play

E fundit!

x

Edi Rama, si prokuror i prokurorëve dhe gazetarët specialë

26 Shkurt 2025, 12:42, Editorial CNA
Edi Rama, si prokuror i prokurorëve dhe gazetarët specialë
Edi Rama, kryeminister

Kryeministri Rama sërish sot ka përmendur gazetarët specialë duke thënë se duhet të ndërpresin marrëdhëniet me gazetarët e të mos furnizojnë miletin me sekretet hetimore.

“Të ndërpresin marrëdhëniet me gazetarët special të mos furnizojnë miletin me sekrete hetimore të mos sillen sikur janë redaksi gazetash portalesh kanalesh dhe të bëjnë punën e tyre. Sa herë do kapin korrupsion të hapin krahun me gjithë forcën”, ka deklaruar Rama.

Në fakt, kryeministri bën mirë mos t’i quajë gazetarët specialë, por të marrë dhe të lexojë vendimin e gjykatës.

Asgjë më shumë se kaq. Nuk ka gazetarë specialë, ka gazetarë që lexojnë, ka dhe gazetarë që nuk lexojnë apo si kryeministri që ndoshta është i paditur që nuk duam ta besojmë apo që ndoshta e gënjejnë.

Ndaj më shumë sesa të lodhet me gazetarët specialë për të cilët po të ishte burrë i kishte ftuar njëherë në një konferencë shtypi, nuk dilte të mbante llogje në grupe parlamentare pa pasur asnjë përgjegjësi publike. Vërtetë llogje sepse kryeministri ynë thotë se janë ata studentët dhe pedagogët e universitetit.

Po sikur këta pedagogët të jenë sikur edhe 1% të korruptuar dhe të kenë marrë para, si i bie? Kush mban përgjegjësi?

Kryeministri më shumë sesa të bëjë avokatinë e kryebashkiakut me dy akuza mjaft të rënda penale siç është korrupsioni dhe pastrimi i produkteve të veprës penale nga të cilat rrezikon deri në 15 vjet burg me dy vendime nga gjykata mirë do ishte t’i thërriste njëherë këta gazetarët në konferencë shtypi të merrnin vendimin e gjykatës përpara dhe të lexonin të zezën mbi të bardhë.

A ka një sjellje të dyfishtë në këtë rast Edi Rama?

Apo ia kanë fajin gazetarët specialë sepse dikur për Arben Ahmetajn tha dardha dhe kumbulla, nuk foli për Berishën dhe Metën të cilët vërtetë shkuan pas hekurave, shkuan përmes së njëjtës strukturë dhe procedurave ligjore siç shkoi Erioni.

Shqipëria ka një Kod Penal, i cili u harmonizua kur u bë Reforma në Drejtësi dhe është e zeza mbi të bardhë, e shkruar, cilat janë masat e sigurisë apo cilët janë hapat në gjykatë që nga i pari tek i fundit, që nga gjyqi për masë sigurie, gjyqtari paraprak apo gjyqtari i themelit dhe Edi Rama e di shumë mirë këtë.

Nuk ka pse shqetësohet as për gazetarë specialë dhe as për jospecialë.

Po është burrë le t’i mbledhë një herë këta gazetarët specialë në një konferencë shtypi, jo që të flasë siç do ai dhe të mbajë leksione si para turmës së partisë së tij, por të marrë vendimin e gjykatës për Erion Veliajn, të lexojë nëpër rreshta faktet dhe provat.

Mirë është të marrë dhe Klotilda Bushkën se e ka juriste shumë të zonjën, aty në krah të mbajë dhe Fatmir Xhafajn që po i jep leksione të mira jurisprudence dhe po na tregon vendimet e gjykatës së Strasburgut, ku në fakt dënimi më i madh që ka marrë Shqipëria nga Strasburgu janë 130 milionë euro nga mesazhet e Erion Veliajt për rastin “Becchetti”.

Ndoshta Rama këtë nuk do ta mbajë mend, por do të na tregojë se nga gjykatat po humbim para.

Aq para ka humbur Shqipëria në Strasburg nga Erion Veliaj sa nuk ka për t’i humbur në 100 vite ndoshta në çdo lloj vendimi tjetër të dhënë nga drejtësia shqiptare.

Dhe më shumë sesa kryeministri t’u drejtohet gazetarëve specialë apo të sillet si prokuror i prokurorëve do të ishte e rëndësishme që të mbante përgjegjësi publike sepse janë paguar qindra miliona euro për inceneratorë që nuk ekzistojnë dhe nuk punojnë, janë vjedhur dhjetëra miliona euro nga drejtorët e “5D”-së së Erion Veliajt, janë bërë qindra miliona euro koncesione dhe njerëzit janë në burgje me fakte dhe prova konkrete.

Dhe, Erion Veliaj ndodhet pas hekurave me përgjegjësi ligjore, ndërsa Edi Ramës nuk i kërkohet asgjë më shumë sesa përgjegjësi morale dhe politike.

Nëse e ka humbur rrugës përgjegjësinë morale dhe politike, nuk e gjen dot as duke folur për gazetarët specialë, as duke gënjyer me gjoja vendime të Strasburgut, as duke mbrojtur Klotilda Bushkën apo rektorët e një universiteti të kalbur dhe me një tufë njerëzish të arrestuar apo me mendtë e Fatmir Xhafajt që po e çojnë Edi Ramën në një rrugë pa krye, së cilës do zoti i del deri në fund./ CNA





Lajmet e fundit nga