Amnistia fiskale shmang "pastrimin e parave"/ Ekonomia do të marrë frymë lirshëm

26 Qershor 2022, 09:40, Editorial CNA
Amnistia fiskale shmang "pastrimin e parave"/ Ekonomia do të
Foto ilustruese

Historitë e tipit, ku një shtetas shqiptar në emigrim ndalohet në kufi nëse ka para me vete përtej shumës së vendosur me ligj, pritet të marrin fund me amnistinë fiskale.

Në vend që të shkojë për ndjekje penale, emigranti, i cili mund të ketë bërë dy apo tri punë në të zezë, i jepet hapësira për të legalizuar mundin dhe djersën e tij.

Aktualisht është detyrim ligjor për çdo qytetar që të deklarojë se disponon me vete shuma mbi 10 mijë dollarë kur kalon kufirin në hyrje apo në dalje të Republikës së Shqipërisë.

Bankat kanë gjithashtu detyrën që të raportojnë rastet kur qytetarët paraqiten në sportel dhe dëshirojnë të depozitojnë shuma të mëdha.

Por, me amnistinë fiskale, të gjithë shtetasit shqiptarë, përfshirë emigrantët dhe kompanitë që operojnë në vend do të kenë të drejtë të deklarojnë pasurinë e tyre pa provuar burimet se si e kanë siguruar.

Projektligji “për Amnistinë Fiskale”, lejon që një individ së bashku me familjarët e tij të ketë mundësi të legalizojë pasuri me vlerë deri në 2 milionë euro.

Gjithashtu do të lejohet legalizimi i pasurive të patundshme, bilanceve të biznesit, dhe sende me vlerë si makina, vepra arti dhe gurë të çmuar.  

Procesi i amnistisë do të zgjasë 9 muaj dhe tatimi që do të mbahet për ata që deklarojnë 4-mujorin e parë është 7% e vlerës dhe 10% për muajt e fundit.

Por, paratë dhe pasuritë që do të legalizohen duhet të rrinë të paktën 5 vjet në territorin shqiptar dhe në rast se tërhiqen do t’u vendoset një penalitet në 30% të shumës që transferohet.

Nisma për amnistinë fiskale, e cila ka qenë ide e ish-kryeministrit Sali Berisha që në vitin 2011, do të thotë që biznesi të marrë frymë lirshëm dhe ekonomia të vihet në lëvizje pozitive.

Amnistia fiskale nuk duhet përdorur për politikë

Legalizimi i parave dhe patundshmërive, që do të jetë në favor të biznesit, por edhe të qytetarëve, nuk duhet parë politikisht.

Në 2011, u pa në aspektin politik nga socialistët dhe nuk u miratua. Tashmë, pas 11 vitesh kur socialistët janë penduar dhe propozojnë amnistinë fiskale, nuk duhet të kundërshtojnë ata që ishin pro në vitin 2011.

Ashtu si çdo fushë tjetër, edhe në ekonomi Shqipëria ka nevojë për një reformë të thellë, po aq e thellë sa ajo e sistemit të drejtësisë.

Amistia fiskale nuk është një projekt i ri, pasi është vënë në zbatim edhe me herët nga vendet e rajonit, por edhe në Europë.

Legalizimi i parave dhe patundshmërisë, për ata njerëz që kanë punuar në dy a tri vende njëherësh në të zezë është një proces që jo vetëm u intereson qytetarëve dhe bizneseve, por një proces që zhbllokon ekonominë dhe ndikon në zhvillimin e vendit.

Thënë më qartë, gjithçka do të jetë më e pastër, do të shmanget vepra penale e pastrimit të parave, do të ketë rroga më të larta, do të ulet numri i të punësuarve në të zezë dhe ekonomia do të marrë frymë lirisht./CNA.al

Lajmet e fundit nga