LEXO PA REKLAMA!

SHKARKO APP

App Store
Google Play

Njeriu i listave të mbyllura kërkon lista të hapura

24 Maj 2023, 19:06, Politikë CNA
Njeriu i listave të mbyllura kërkon lista të hapura
Lulzim Basha

Lulzim Basha, njihet si njeriu që “dashuronte” listat e mbyllura dhe përjashtoi këdo që nuk donte nga Partia Demokratike.

Në të gjitha zgjedhjet kur ishte kryetar, Basha i bëri vetë listat. I tillë ishte edhe rasti i zgjedhjeve parlamentare të 2017-ës, ku përjashtoi nga listat figura me kontribut në PD. Të njejtën skemë, ai e ka përdorur edhe për të mos lejuar guximtarët brenda PD-së që ngritën zërin kundër mënyrës së drejtimit të partisë.

Por sot, kryetari i listave të mbyllura jep leksione për lista të hapura.

Gjatë një takimi me të rinj të FRPD-së, Basha bëri 4 propozime që sipas tij nxjerrin vendin nga emergjenca kombëtare, njëra prej të cilave ishte listat e hapura 100%.

“Ftesa ime sot është mos t’u besojmë politikanëve, por përmes listave të hapura t’u besojmë qytetarëve. Të ndalim së besuari politikanëve dhe të marrim besimin në duart tona si qytetarë. Listat e hapura 100%. Kam edhe dy propozime të tjera.

Keni dëgjuar për akuzat dhe sulmet e përditshme që politikanët hedhin ndaj njëri tjetrit. Duhet vettingu i politikanëve, boll më me sharje nga mëngjesi deri në darkë. Secili që merr përsipër barrën e shërbimit publik duhet të jetë i hapur për hetim të aseteve personale. Vettingu i politikës është emergjencë kombëtare.

Asnjë kryeministër që nuk mund të arrijë premtimet e dhëna në 2 mandate, nuk mund t’i bëjë ata për një mandat të tretë. Pra kufizimi i mandateve është i domosdoshëm. Gjithashtu edhe vota e emigrantëve , rreth 45% e bashkëatdhetarëve tanë nuk ndodhen sot në vend, janë larguar në mënyrë masive por nuk kanë të drejtën të shprehen me votë. Është vendim i GJK-së, duhet zbatuar”, deklaroi ai.

Kështu, Basha u mundua sot të vijë me një profil të ri, si një person që është kundër listave të mbyllura, duke kërkuar lista të hapura./ CNA.al

Lajmet e fundit nga