Skandali me analizat në QSUT/ Si e shkatërruan PPP-të e qeverisë unitetin funksional të spitalit

2 Qershor 2022, 18:45, Aktualitet CNA

Skandali me analizat në QSUT/ Si e shkatërruan PPP-të e

Qendra Spitalore Universitare “Nënë Tereza”

Qendra më e madhe spitalore në vend "Nënë Tereza” nuk kryen dot më asnjë analizë për pacientët, duke nisur nga data 1 qershor, përveç atyre të raportuara me Kod të Kuq.

Kjo për shkak se buxheti te koncesionari është ezauruar në masën 100%. Skandali i dalë përtej ‘dyerve’ të QSUT këtë herë, dhe jo i pari, është publikuar pak ditë më parë nga mediat me fakte.

Mesazhet e publikuara nga mediat tregojnë qartë se si shefave të pavionëve u kërkohet që t'u tërheqin vëmendjen mjekëve që të mos bezdisin me koncensionarin, pasi kërkojnë me insistim të kryhen analizat e pacientëve.

Në fakt ky nuk është rasti i parë që denoncohet, pasi edhe para dy muajsh pacientët u lanë pa analiza, pavarësisht nga sëmundjet, nga më të rëndat në rrezik për jetën.

Lidhur me këtë situatë CNA.al, ka pyetur dhe deputetin dhe ish-ministrin e Shëndetësisë Tritan Shehu, i cili e ka ngritur disa herë si shqetësim dhe ka qenë ndër të parët që e ka kundërshtuar.

Për Shehun, dhënia me koncension e laboratorëve shkatërron unitetin funksional të spitalit, pa llogaritur këtu çështjen e monopoleve, keqpërdorimin e fondeve apo koston që ka për vetë pacientin.

“Me fondet e shtetit është krijuar një monopol privat kombëtar që është e papranueshme. Shkatërron unitetin funksinal të spitalit, ndërsa për spitalet universitare shkatërron projektet universitare, kërkimin shkencor etj.

Po ngelen pa shërbim edhe qytetarët, detyrohen të paguajnë, të shkojnë t’i bëjnë analizat te privati.

Kjo nuk është hera e parë, ka ndodhur edhe për kujdesin parësor. Paguhen rreth 10 milionë euro në vit për laboratorët.

Çfarë ndodhi?

I dhanë laboratorët shtetërorë privatit dhe i paguan çdo vit dhe ai pa investuar fare vijon të përfitojë kurse i gjithë shërbimi është krejtësisht jashtë loje.

Kujdesi parësor është i bllokuar, sepse atje checkup-i ka shkatërruar të gjithë laboratorët e kujdesit parësor. Nga ana tjetër në laboratët e spitaleve është futur kjo PPP.

Kjo ështe e papranueshme, është krijuar një monopl privat kombëtar me të gjithë laboratorët e Shqipërisë me fond publik të paguar nga shteti.

Dhënja e laboratorit privatit shkatërron spitalin. Prish unitetin e funksionimit të spitalit.

Laboratori nuk është lavanderia, nuk është mensa, nuk është pastrimi i kopshtit, as rregullimi i pemëve jashtë. Është zemra teknike funksionale e spitalit.

Nuk ndodh, është e paimagjinueshme, një shembull i tillë në Europë, që qendrave spitalore universitare t’ua heqësh laboratorin, t’ia japësh privatit.

Ti përjashton Qendrën Spitalore Universitare edhe nga kërkimi shkencor, edhe nga rrezatimi i gjithë vendit në nivel laboratorik, pa shtuar këtu pastaj çështjet e monopoleve, çështjen e keqpërdorimit të fondeve.

Janë miliona e milona euro në vit që harxhohen kot. Për pacientin ka vetëm një rrugë, të shkojë të bëjnë analizat te privati me lekë në xhep që është akoma më kriminale”, - tha Shehu./E.T-CNA.al

Skandal në QSUT/ Nuk kryhen analizat se mbaruan fondet te koncesionari
30 Maj, 20:15