Raporti famëkeq i Dick Marty-t/ Rama: Nuk do të ndalemi së luftuari për pastërtinë e luftës çlirimtare të Kosovës

25 Shtator 2022, 10:00, Aktualitet CNA

Raporti famëkeq i Dick Marty-t/ Rama: Nuk do të ndalemi së

Kryeministri Edi Rama

Kryeministri Edi Rama, përmes një reagimi në rrjetet sociale ka shkruar se Shqipëria nuk do të ndalet së luftuari për pastërtinë e luftës çlirimtare të Kosovës dhe rishikimin e Rezolutës së Këshillit të Europës në mbështetje të raportit të Dick Marty-t.

“Shqipëria nuk do të ndalet së luftuari për pastërtinë e luftës çlirimtare të Kosovës dhe rishikimin e Rezolutës së Këshillit të Europës në mbështetje të raportit famëkeq të tregimtarit Dick Marty!”, shkruan Rama.

Ndër të tjera, Rama ka ndarë një pjesë nga fjalimi i tij, ku thotë se raporti ishte tronditës dhe u shndërrua në faktorin kyç të ushqimit të idesë dhe ngritjes së dhomave të specializuara të gjykatës për Kosovën.

Kryeministri thotë se pavarësisht çdo përpjekjeje hetimore gjatë 11 viteve ende nuk janë vërtetuar këto akuza.

Në mungesë provash, Rama shprehet se shpreson që Asambleja e Këshillit të Europës, do të nderojë të vërtetën dhe do pranojë kërkesën e Shqipërisë për të pasur një raport vijues, ndërkohë që dëmi është bërë dhe të ndihmojë të rivendosë besueshmërinë e një organizate kaq të rëndësishme ndërkombëtare.

“Nuk mundem të mos ndaj këtu me ju një shembull të tmerrshëm që duhet të jetë një mësim për të gjithë botën, e pikë së pari për botën demokratike.

Në vitin 2011 Asambleja Parlamentare e Këshillit të Europës, miratoi një raport të përpiluar nga një parlamentar i zellshëm me emrin Dick Marty ku akuzohej UÇK për krimin e neveritshëm të trafikimit të organeve.

Z.Marty duhej të ishte paguar si tregimtar, por kurrë të besohej si raportues i Këshillit të Europës.

Raporti i tij ishtë tronditës e jo vetëm shumë, asokohe i besuan, por u shndërrua në faktorin kyç të ushqimit të idesë dhe ngritjes së dhomave të specializuara të gjykatës për Kosovën.

U bë një prej rasteve më të këqija të realitetit të shtrembëruar, lloji i manifestit për propagandën mbarëbotërore kundër pavarësisë së Kosovës. Çdo përpjekje hetimore gjatë këtyre 11 viteve të gjata për t’i vërtetuar këto akuza, por më kot, asnjë grimë prove apo treguesi nuk u gjet askund në Kosovë apo dikut tjetër që kishte të bënte me trafikimin e dyshuar të organeve.

E megjithatë dhomat e specializuara për Kosovën u ngritën mbi këtë raport, ndërkohë që flasim ka arrestuar pa padi presidentin e Kosovës Hashim Thaçi.

Ne mendojmë që dhe shpresojmë që bazuar në këtë mungesë provash, saktësisht, Asambleja e Këshillit të Europës, do të nderojë të vërtetën dhe do pranojë kërkesën e Shqipërisë për të pasur një raport vijues, ndërkohë që dëmi është bërë dhe të ndihmojë të rivendosë besueshmërinë e një organizate kaq të rëndësishme ndërkombëtare”, ka thënë Rama në fjalimin e tij./ CNA.al