Protesta e opozitës/ Meta: Tubimet duhet të jenë paqësore

25 Maj 2019, 10:24, Aktualitet CNA

Protesta e opozitës/ Meta: Tubimet duhet të jenë paqësore

Presidenti i Republikës, Ilir Meta, ka reaguar sot lidhur me protestën që pritet të zhvillohet në orën 19:00 në kryeqytet.

Protesta e opozitës joparlamentare do të zhvillohet para Kryeministrisë dhe pritet të ketë pjesëmarrëje të gjerë. Duke qenë se protestat e fundit kanë qenë të dhunshme dhe me incidente, Meta u ka bërë thirrje krerëve të opozitës për një protestë të qetë dhe paqësore pasi për çdo gjë do të mbajnë përgjegjësi.

Meta është shprehur se tubumet paqësore janë në e drejtë legjitime e demokracisë prandaj me rëndësi është që protesta të jetë tërësisht paqësore.

“Në prag të protestës kombëtare të thirrur sot në mbrëmje nga drejtuesit e Opozitës së Bashkuar, duke shprehur bindjen se tubimet paqësore e demokratike, janë një e drejtë fondamentale e demokracisë, legjitime e kushtetuese, dua të theksoj se sa e rëndësishme është që ajo të jetë tërësisht paqësore.

Si President i Republikës kam qenë dhe jam i bindur se është më mirë që shqiptarët të protestojnë për të drejtat e tyre dhe të kërkojnë një Shqipëri më të mirë dhe gjithëpërfshirëse, se sa të largohen nga vendi. Në protestat e mëparshme, pavarësisht nga përkrahja qytetare, janë vërejtur disa akte dhune të papranueshme, ndaj dua t?ju kujtoj se drejtësia e kauzës tuaj, nuk duhet të cënohet nga veprime të papërmbajtura të individëve të caktuar.

Është përgjegjësi e udhëheqësve të Opozitës së Bashkuar për mbarëvajtjen e protestave ku ata ftojnë qytetarët të marrin pjesë. Vetëm në këtë mënyrë, kauza juaj për një demokraci të vërtetë, që garanton një bashkëjetesë të gjerë qytetare, legjitimitet e funksionalitet të institucioneve, do të dëgjohet më mirë brenda dhe jashtë vendit. Protestat e vazhdueshme të opozitës kanë pasur vëmendjen dhe janë transmetuar nga mediat më të njohura botërore, por imazhet tërësisht paqësore të protestës suaj do t?i shërbejnë më mirë të ardhmes europiane të Shqipërisë” deklaron Meta.

Kështu për herë të parë Presidenti i Republikës rreshtohet publikisht në krah të ndërkombëtarëve dhe të gjithë zërave brenda dhe jashtë vendit që dënojnë dhunën gjatë protestave të opozitës. Në orën 19:00 opozita do të protestojë para Kryeministrisë duke kërkuar largimin e Edi Ramës, teksa ka bojkotuar zgjedhjet lokale të 30 qershorit. Meta dje deklaroi se është gati që të shtyjë datën e zgjedhjeve nëse palët kanë vullnet për zgjidhjen e krizës. Kryeministri i ka drejtuar Bashës katër letra publike duke kërkuar dialog, po ashtu edhe Gjermania është angazhuar, por Basha ka vendosur kusht largimin e Ramës.” CNA.al