E fundit!

09:27 Kronika

E rëndë në Korçë, 66-vjeçari i jep fund jetës

Rreth orës 08:40, në lagjen nr. 10, Korçë, një automjet ti...

Pa mbështetje, pensionistët e Korçës ankohen për pensione të ulëta dhe çmime të larta

2 Tetor 2022, 22:35, Sociale CNA

Pensionistët e Korçës

Dita e parë e muajit tetor është dita Ndërkombëtare për të moshuarit. Edhe pse një ditë, ku në gjithë botën mbahen aktivitete në nder të tyre, në Korçë pensionistët i gjejmë si çdo ditë, në parkun “Shën Mëria” duke luajtur domino, edhe pse koha nuk është e favorshme.

"Euronews Albania" i pyeti se sa të vlerësuar ndihen ata nga qeveria shqiptare dhe a ka bërë kjo e fundit mjaftueshëm për ta.

“Nuk jemi fare të vlerësuar. Pensionet janë shumë të ulëta, çmimet stratosferë, drutë 1 metër 80 mijë lekë. Ne 150 mijë lekë marrim dhe kemi punuar një jetë të tërë. Hiç, për ne pensionistët asgjë s’ka bërë. Ka 10 vite, sikur nga 5 mijë lekë çdo vit ta ngrinte pensionin, sot do ishte 50 mijë më tepër”, thotë një i moshuar.

“Nuk jem aq të vlerësuar jo, pensionet e pakta, nuk jepet trajtimi i duhur. Asnjë shtesë për pensionistët, rrogat ngrihen për mjekët, doktorët, policët ata që marrin e lek nën dorë për ne na rri në vend. Jetesën nuk e përballojmë dot siç duhet”, shprehet një tjetër.

Viola Çekani, specialiste e cila punon me moshën e tretë tregon disa prej problematikat kryesore të tyre.

“Situata e moshës së tretë këtë vit është më e rënduar dhe flasim për nevoja bazike; ushqime dhe ngrohja në Korçë, që dihet si është dimri në këtë qytet. Këtë vit ata nuk kanë mundësi të blejnë mjaftueshëm ushqime dhe nuk kanë mundësi të blejnë dru për ngrohje”, thotë Çekani.

Aktivistja Çekani shprehet se bashkitë e vendit dhe vet komuniteti duhet të bëjë më tepër për të ndihmuar këtë grupmoshë.

“Mosha e tretë ka nevojë për mbështetje konkrete, flas për pushtetin qendror, lokal, bashkitë që e kanë përgjegjës të tyre të kujdesen për këto grupe. Pa diskutim investimet ne infrastrukture janë të nevojshme por në kohë krize si këto bashkitë duhet të bëjnë prioritet mbështetjen për ta. Thirrje tjetër shkon për komunitetin pasi le për te dëshiruar. Ne Shqipëri është bërë zakon të ankohemi për varfëri e skamje, por nuk jemi në atë pikë mos japim diçka minimale për këta të moshuar”, shprehet ajo.

5 nga 6 bashkitë e Juglindjes nuk kanë ndërtuar asnjë qendër komunitare ditore për pensionistet, duke përjashtuar Bashkinë e Korçës.