E fundit!

15:16 Aktualitet

Komunikimi me Ramën dhe kërcënimi nga Bajrat/ Koçeku flet për largimin nga Grupi i PS-së

Deputetja Marjana Koçeku ka folur ditën e sotme lidhur me ...

Maturantët kanë paralajmëruar protestë/ Dalin notat e provimit të Biologjisë

27 Qershor 2022, 08:57, Sociale CNA

Maturantët kanë paralajmëruar protestë/ Dalin notat e

Foto ilustruese

Kanë dalë notat e provimit të Biologjisë.

Ditën e shtunë, maturantët u testuan në lëndën me zgjedhje, ndërsa të shumë ishin ata që shprehën pakënaqësi ndaj tezës së Biologjisë.

Për këtë arsye, Ministria e Arsimit reagoi duke thënë se teza është hartuar sipas programit, ndërsa premtoi se ditën e hënë do të publikoheshin përgjigjet.

Duke e mbajtur fjalën, përgjigjet kanë dalë sot pa shkuar ora 09:00, ndërsa në orën 10:00 ishte paralajmëruar protesta e maturantëve para Ministrisë së Arsimit.

Ministrja e Arsimit, Evis Kushi, tha në një video-mesazh se shumë prej maturantëve kanë shkëlqyer, madje përtej pritshmërive, duke vërtetuar që testi ka qenë një matës i mirë i përgatitjes së gjithsecilit.

Ministrja thekson se pas vlerësimit të bërë është konfirmuar që testi nuk ka asnjë gabim shkencor dhe pyetjet janë hartuar sipas niveleve të vështirësisë për të diferencuar secilën notë.

"Të dashur maturantë,

Siç ju premtuam, menjëherë pas provimit të biologjisë u angazhuam maksimalisht me mësuesit dhe ekspertët më të mirë, për të vlerësuar testin dhe për të marrë të gjitha masat e nevojshme që secili prej jush të ketë vlerësim të drejtë, sipas nivelit të arritjeve.

Ju konfirmoj që testi nuk ka asnjë gabim shkencor dhe pyetjet janë hartuar sipas niveleve të vështirësisë, për të diferencuar secilën notë, e për të mos penalizuar as nxënësit e shkëlqyer, por për të vlerësuar të gjithë sipas punës e meritës.

Nisur nga shqetësimet tuaja, kemi punuar ditë e natë me mësuesit vlerësues për të garantuar shpalljen e rezultateve, me cilësi të lartë dhe në kohë sa më të shpejtë.

Jam shumë e kënaqur që shumë prej jush kanë shkëlqyer, madje edhe përtej pritshmërive, duke vërtetuar që testi ka qenë një matës i mirë i përgatitjes së gjithsecilit.

Tashmë rezultatet janë të publikuara në faqen zyrtare të Qendrës së Shërbimeve Arsimore dhe secili prej jush mund të gjejë vlerësimin e testit të tij.

Sot gjatë ditës do të publikoj edhe disa teste të maturantëve që janë përgjigjur saktë dhe kanë marrë pikët maksimale. Ju uroj të gjithëve shumë suksese në vazhdimin e rrugëtimit tuaj drejt dijes", tha Kushi.