LEXO PA REKLAMA!

SHKARKO APP

“Veliaj, përgjegjës për ‘5D’-në”/ Bardhi: Afera s’mbyllet me disa drejtorë

2 Prill 2024, 09:31, Politikë CNA
“Veliaj, përgjegjës për ‘5D’-në”/
Nënkryetari i PD-së, Gazment Bardhi

Nënkryetari i PD-së, Gazment Bardhi, kërkoi hetime për kryebashkiakun Erion Veliaj në lidhje me arrestimet e drejtorëve të Bashkisë së Tiranës, për dosjen “5D”.

Bardhi tha se nuk duhet fshehur përgjegjësia e Veliajt në këtë aferë, ku drejtorët kanë marrë miliona euro nga taksat, duke ia dhënë tenderët e bashkisë kompanisë së tyre.

Ai deklaroi në një intervistë me Alba Alishanin se kryetari i bashkisë është titullar i autoritetit kontraktor dhe e ka për detyrë të mbikëqyrë çdo procedurë tenderimi.

Bardhi deklaroi se nuk mund të mbyllet me disa drejtorë apo ish-drejtorë, ndaj duhen thelluar hetimet.

“Ajo që mua më shqetëson si opozitar është se është e paimagjinueshme që prokuroria të thotë që 5 drejtorë, vartës të Erion Veliajt, kanë ndërtuar një skemë që paratë e buxhetit të bashkisë i çojnë në kompani përmes tenderëve, në kompani që zotërohen prej tyre dhe kryetari i bashkisë të mos ketë ditur gjë.

Kryetari i bashkisë është titullar i autoritetit kontraktor sipas ligjit. Edhe nëse e ka deleguar këtë kompetencë, e ka për detyrë të mbikëqyrë çdo procedurë tenderimi dhe mbi të gjtha të marrë informacion cilat janë kompanitë që bëjnë punë në Bashkinë e Tiranës.

Pra, fakti që të 5 drejtorët kanë marrë para të buxhetit të shtetit dhe i kanë çuar në kompani në emër të tyre, përmes tenderimeve zyrtare të Bashkisë së Tiranës, absolutisht sjell përgjegjësi ligjore për kryetarin e bashkisë.

Unë pres nga SPAK-u dhe ky është apeli im që t’i shkojë çështjes deri në fund. Hetimet vijojnë në dijeninë time. Në qoftë se mendojnë se afera miliona euro të shpërdorimit të buxhetit të Bashkisë së Tiranës, apo të shpërdorimit të buxhetit të shtetit do t’i mbyllin me disa drejtorë apo ish-drejtorë, gabohen rëndë.

Ne nuk mund të fshehim përgjegjësinë e kryetarit të bashkisë përmes arrestimit, ata janë hajdutë të rëndomtë, në kupimin që kanë marrë paratë e bashkisë dhe i kanë çuar në shtëpinë e vet, ndërkohë që qytetarët e Tiranës i kanë besuar Erion Veliajt çelësat dhe garancitë për të ruajtur buxhetin e Bashkisë së Tiranës, nuk ua kanë besuar këtyre drejtorëve”, u shpreh ai.

I pyetur nëse mund të cilësohet si kumbulla të ngrëna pas shpine, nënkryetari i PD-së theksoi se kjo ka zero shanse të ndodhë.

“Ka zero shanse, kjo është një teori tërësisht e shmangies së përgjegjësisë, qoftë politike, morale, qoftë edhe ligjore. Edhe kryeministri nuk mund të thotë ma bëri ministri pas shpinës sepse kryeministri sipas kushtetutës mbikëqyr veprimtarinë e çdo ministri”, nënvizoi Bardhi./ CNA

Lajmet e fundit nga