Veliaj mburret me kullat në Tiranë/ Kemi ndërtuar hotele me 5 yje

28 Mars 2023, 13:31, Politikë CNA

Veliaj mburret me kullat në Tiranë/ Kemi ndërtuar hotele me 5 yje

Kryebashkiaku i Tiranës, Erion Veliaj

Kryebashkiaku i Tiranës, Erion Veliaj, ka folur për zhvillimin ekonomik të kryeqytetit si dhe projektin e ri për ndërtimin e Zonës së Lirë Ekonomike.

Gjatë fjalës së tij në mbeldhjen e zhvilluar lidhur me Zonën e Teknologjisë dhe Zhvillimit Ekonomik në Tiranë ai u shpreh se ky projekt do të përfshijë një territor të madh në kryeqytet.

“Ky është një projekt për të cilin kemi kohë që punojmë. Ka qenë një bashkëpunim i jashtëzakonshëm mes Qeverisë dhe Bashkisë. Bëhet fjalë për një territor të madh toke, fillimisht 35ha, potencialisht 50ha dhe idealisht 100ha, në varësi si ecën projekti, i cili ndodhet në një hapësirë fushore mes dy akseve, aksit të Kombinatit dhe aksit të rrugës Tiranë-Durrës-Kashar. Kjo hapësirë do të jetë shtëpia e re e Zonës së Lirë Ekonomike të Tiranës, ku një biznes mund të investojë pa u shqetësuar se kush e ka tokën në pronësi, me sa pronarë duhet të flasë, sa negociata duhet të bëjë, kush do të jetë sekseri, apo agjencia, që do të më koordinojë etj. Nuk ka dhimbje koke si këto. Qeveria dhe Bashkia kanë krijuar një stacion, i kanë dhënë një status ligjor kësaj zone të lirë ekonomike dhe një kompani mjafton vetëm të paraqitet tek enti zbatues, për t’u akomoduar në Zonën e Lirë Ekonomike,” u shpreh Veliaj.

Ndër të tjera kryebashkiaku nuk ka humbur mundësinë për të mburrur edhe një herë kullat e ndërtuara në Tiranë në të cilat ai u shpreh se janë ndërtuar hotele me 5 yje duke theksuar kështu edhe rëndësinë e tyre për zhvillimin ekonomik të vendit.

“Këtu bëhet fjalë për punët e së ardhmes, jo për punët e së kaluarës. Me gjithë respektin për këdo që i ka bërë këto punë në vitin 2000, si fasonët apo call center, punë të cilat paguheshin pak, por në këto 10 vite ekonomia e vendit ka ndryshuar. Sot kemi hotele me 5 yje, në ato kullat e anatemuara, dhe sot gjysma e ekonomisë është IT dhe turizëm. Bëhet fjalë për të transferuar në Tiranë data-centerin më të madh të të gjithë Ballkanit dhe për të kaluar nga fasonët dhe call center në data center, për punë që paguajnë më shumë, me inxhinierë të teknologjisë së informacionit, dizanjer softuerësh, që mirëmbajnë rrjete, me rroga të barabarta me ato në perëndim, që mund të kthehen në spiranca për kompani të tjera”,tha ai./CNA.al