E fundit!

07:54 Politikë

E enjte intensive për Kuvendin/ Projektligje dhe 6 interpelanca me Ramën dhe ministrat

Kjo e enjte pritet të jetë një ditë me diskutime të shumta...

Trashëgimtare e Berlusconit?/ Rama: Giorgia Meloni është pasardhëse e një tigri, jo rinoceronti

13 Gusht 2023, 10:20, Politikë CNA

Trashëgimtare e Berlusconit?/ Rama: Giorgia Meloni është

Silvio Berlusconi dhe Giorgia Meloni

Kryeministri Edi Rama ka folur për kryeministren e Italisë, Giorgia Melonin, me të cilën ka treguar jo pak herë se ruan raporte miqësie.

Në një intervistë për median italiane “Libero”, Rama tha se Meloni ka aftësi mahnitëse në komunikim si një evropiane e thekur.

“Në skenën ndërkombëtare, Giorgia i ka surprizuar të gjithë, e do të thosha alla grande, sepse teksa prisnin një përbindësh fashist që do të marshonte mbi Europë, u gjendën përballë një gruaje me aftësi mahnitëse në komunikim si një evropiane e thekur, që deri më tani s’ka thënë asgjë gabim. E djathta, e majtë, fashizmi, socializmi kanë kuptim kur flasim për histori, por kërkimi i sensit të tyre të hershëm në politikën e sotme mund të na ngatërrojë me këmbët tona. Po, unë jam socialist, i bindur për rrugën e Tretë të Klintonit, Blairit, Schroederit, Romano Prodit. Por, të qenit i majtë nuk më pengon të bëj zgjedhje që pastaj mund të interpretohen si të djathta, ashtu siç jo të gjitha ato që mbajnë vulën si zgjedhje të majta janë ilaçe që duhen gëlltitur duke kënduar "Bella Ciao"! Dhe pastaj, në kohën e teknologjisë së re, Intelligjencës Artificiale, globalizimit, ka rrezik që të mbytemi në një gotë ujë duke përzier koncepte të vjetra me probleme dramatike për të zgjidhur. Ne duhet të rishpikim gjithë ç’është e mundur dhe të rishpikemi me ngulm në një botë që ndryshon pa marrë as frymë”, u shpreh ai.

Kreu i qeverisë u ndal edhe te ish-kryeministri Italian, Silvio Berlusconi, për të cilin deklaroi se e ka njohur shumë pak, por e kujton si një njeri të buzëqeshur.

“E kam njohur shumë pak, por e kujtoj i buzëqeshur. Dhe e kam ridëgjuar e lexuar disa herë fjalimin e kryepeshkopit në funeralin e tij, një adresim jashtëzakonisht i bukur për një njeri, që le ta themi duke përdorur një eufemizëm, nuk ishte subjekti më i lehtë për një prift. Nga ato pak takime që kam pasur me të, kam krijuar ndjesinë e një njeriu që kishte një ndjeshmëri gjenuine ndaj tjetrit”, theksoi Rama.

Ai u pyet nga media e shtetit fqinj nëse e sheh Giorgia Melonin si një trashëgimtare të Berluskonit.