Kritikoi "peshkaqenin" Sulejmani/ Balla “zbarkon” sërish në Vlorë, takim me drejtuesit e policisë

10 Gusht 2023, 18:30, Politikë CNA

Kritikoi "peshkaqenin" Sulejmani/ Balla “zbarkon”

Të hënën e 7 gushtit, ministri i Brendshëm, Taulant Balla shkoi në Vlorë dhe kritikoi Drejtorin e Kufirit, Eduard Sulejmani, pas denoncimeve të bëra nga CNA se zyrtari i policisë sulmon bizneset dhe njerëzit e pajisur me dokumente për të marrë haraçin.

Balla “i tërhoqi veshin” Sulejmanit, teksa tha se ka rrjedhje informacioni dhe po dekonspirohen aksionet e Policisë së Shtetit.

Kur ka kaluar vetëm 3 ditë nga kjo ngjarje, ministri i Brendshëm ka “zbarkuar” sërish në Vlorë.

Balla zbarkon në Vlorë/ I tërheq veshin "peshkaqenit" Sulejmani: Kemi rrjedhje informacioni, do i presim fijet e tradhtarëve
7 Gusht, 15:21

Por, kësaj radhe Balla ka mbajtur një takim me drejtues dhe forca operacionale të Policisë së Vlorës, të përfshirë drejtpërdrejt në dy operacionet e fundit në këtë qytet, për goditjen e një rasti armëmbajtje pa leje dhe minave me telekomandim.

“Shumë faleminderit për operacionin e kryer me shumë sukses dhe parandalimin e ngjarjeve të rënda kriminale, në këtë kulm të sezonit turistik, ku detyra parësore e Policisë është garantimi i rendit dhe sigurisë publike. Këto grupe kriminale që prej vitesh kanë dëmtuar rendin publik në Vlorë, dukë krijuar ngjarje kriminale, po marrin po marrin dita-ditës goditje. Edhe 2 goditjet e 72-orëve të fundit kanë qenë parandalim nga ana e Policisë për disa ngjarje kriminale.

Unë mendoj se ecja në këtë vazhdë në DVP Vlorë meriton të vlerësohet maksimalisht nga ana ime si Ministër, nga ana e Drejtorit të Përgjithshëm të Policisë, z. Rrumbullaku, u cili ju dërgon mirënjohje e falënderimet e tij. Natyrshëm sikurse e kemi bërë standard në vlerësimin e punës, besoj që drejtori ju ka njoftuar që për gjithë efektivët e përfshirë në aksione dhe operacione me sukses të këtij niveli do të ketë dhe shpërblim financiar për secilin prej jush”, u shpreh ministri.

Ai kërkoi angazhim të lartë dhe integritet në punën e oficerëve të Policisë, në betejën e përditshme me paligjshmërinë dhe krimin e organizuar në veçanti.

“Ju lutem mos e ulni ritmin që keni dhe këtë standard që po vendosni. Dua ta falënderoj Drejtorin, 2 nëndrejtorët dhe secilin prej efektivëve e oficerëve të përfshirë në këto goditje të njëpasnjëshme të krimit të organizuar dhe sigurisë publike”, nënvizoi ministri i Brendshëm./ CNA