LEXO PA REKLAMA!

SHKARKO APP

Vangjel Dule nuk zbut qëndrimin/ “S'ka prova, Beleri po mbahet peng”

11 Gusht 2023, 18:29, Politikë CNA
Vangjel Dule nuk zbut qëndrimin/ “S'ka prova, Beleri po mbahet
Kryetari i PBDNJ-së, Vangjel Dule

Kryetari i Partisë Bashkimi për të Drejtat e Njeriut, Vangjel Dule, ka kërkuar sërish lirimin e Fredi Belerit, kryebashkiakut të zgjedhur të Himarës.

Dule tha në një intervistë televizive se mbajtjen në burg të Belerit e sheh si rrëmbim dhe pengmarrje dhe jo ndalim nga policia.

Kjo, pasi ai pretendon se prokuroria nuk ka asnjë provë dhe asnjë fakt që provon se Fredi Beleri ka kryer korrupsion në zgjedhjet e 14 majit.

Kreu i PBDNJ-së, përsëriti akuzat se i gjithë procesi është i dirigjuar nga kryeministri Edi Rama.

“Zoti Beleri është kryetari i zgjedhur në mënyrë demokratike i Bashkisë së Himarës. Çdo sekond që vazhdon për mua nuk është i ndaluar, është i rrëmbyer dhe po mbahet peng. Për çdo sekond që vazhdon kjo situatë, rëndohet imazhi i demokracisë, i shtetit të së drejtës, i standarteve që kërkohen për t’u respektuar për të drejtat e njeriur dhe të minoriteteve.

Nuk ka asnjë fakt, nuk ka asnjë provë në favor të akuzës. Është një proces i dirigjuar, i motivuar politikisht dhe vetëm për këtë arsye zoti Beleri vazhdon të jetë një i burgosur politik i Zotit Rama.

Në qoftë se shohim në prespektivë, një javë përpara zhvillimit të zgjedhjeve, në një kohë që klima ishte jashtëzakonisht e qete, normale, funksionale, për sa i përket parashtrimit të alternativave të kandidatëve në Bashkinë e Himarës, ishte vizita e Zotit Rama në atë bashki që hodhi vizitën e zjarrit me një agresivitet të pakonceptueshëm ndaj një kandidati dhe tashmë të zgjedhurit në krye të bashkisë, Zotit Beleri. Zoti Rama parapërgatiti terrenin për një javë rresht kudo që u ndodh, në Tiranë, Fier, Kamëz, ku kryefjala e tij ishte kudo Fredi Beleri”, u shpreh Vangjel Dule./ CNA

Lajmet e fundit nga