LEXO PA REKLAMA!

SHKARKO APP

Impianti i përpunimit të ujit në Bovillë, në fazën përfundimtare/ Veliaj: Do të trefishojë kapacitetin

11 Gusht 2023, 16:04, Politikë CNA

Impianti i përpunimit të ujit në Bovillë, në fazën

Në Bovillë ka përfunduar faza e parë e punimeve për impiantin e përpunimit të ujit dhe po realizohet edhe faza II dhe përfundimtare, e cila do ta çojë impiantin në maksimumin e prodhimit të tij, në 3600 l/s. 

Kryebashkiaku i Tiranës, Erion Veliaj tha se kjo është vepra që ka pësuar transformimin më të madh, pasi Tirana, e cila po rritet çdo ditë, e ka pasur të nevojshme një investim të tillë prej vitesh.

“Janë ditë gushti, kur njerëzit janë të fokusuar te pushimet, ndërsa ata pak që kanë qëndruar në Tiranë janë edhe më të ndjeshëm për çështjen e ujit, ndaj e gjykova të udhës që, edhe qytetarët ta shohin me sytë e tyre se çfarë po ndodh në impiantin më të madh dhe me veprën që ka pësuar transformimin më të madh në historinë 103 vjeçare të Tiranës kryeqytet. Tirana e ka pasur të nevojshme prej vitesh një vepër të tillë, kështu që, ky është një moment jo për të kthyer kokën pas dhe për të thënë se përse nuk u bë në gjithë ato vite, por për të parë qytetin që kemi në sfond. Këtu jemi në kodrën e Paskuqanit, ndërkohë qyteti që kemi në sfond është një Tiranë që rritet dhe zhvillohet. Dallohen siluetat e kullave dhe lagjet e pafundme të rritura të Tiranës. Kjo do të thotë se do duhet të mbajmë hapin e qytetit që rritet”, deklaroi ai.

Veliaj nënvizoi edhe faktin se nga një situatë humbjesh të mëdha në rrjet e vjedhjesh të ujit, sasia e ujit që shkon në çezmat e familjeve në kryeqytet po trefishohet.

“Më vjen mirë që, nga një impiant ku shumica e ujit vidhej dhe praktikisht, në vend që uji të shkonte në drejtim të Tiranës, shkonte në drejtim të Paskuqanit, apo tek ata që e merrnin ujin për të bërë lavazhe, sot jemi në një situatë krejt tjetër. Praktikisht, kemi një linjë të dedikuar të padepërtueshme, të paçarë, që ka eliminuar humbjet në rrjet. Ardhja e dedikuar e ujit, pa asnjë humbje, na krijon mundësi që tani të kemi depozitat më të mëdha që ka pasur ndonjëherë Tirana. Sa për të dhënë një ide të atyre që kuptojnë pak nga volumetria, e gjetëm me 1200 m3 ujë/sekondë para shumë vitesh, kaluam në 1800, në 2400 dhe do të mbarojmë me 3600 m3 ujë/sekondë. Pra, praktikisht kemi trefishuar sasinë e ujit që vjen në Tiranë,” u shpreh kreu i Bashkisë./ CNA

Lajmet e fundit nga