LEXO PA REKLAMA!

SHKARKO APP

E fundit!

x

Presidentin e zgjodhi dosja në SPAK

4 Qershor 2022, 08:57, Politikë CNA
Presidentin e zgjodhi dosja në SPAK
Godina e SPAK-ut

Sot në Kuvend do të votohet për personin që do të rrijë në karrigen e Presidentit.

Për ata që besonin se ky "proces" kishte si qëllim zgjedhjen e Presidentit të Republikës, gjërat sa vijnë e qartësohen.

Por si nisi "procesi"?

Dhe a u ndërtua ai si i tillë vetëm në funksion të legalizimit të emrit të Bajramit?

Për habi të të gjithëve, deputetët e grupit parlamentar socialist u vunë të plotësonin ca letra ku duhet të shkruanin emrat e tre Presidentëve potencialë.

Pra, deputetët, jo Rama!

Ata mbushën fletën, jo Rama!

Rama nuk ka përgjegjësi se çfarë shkruajnë deputetët nëpër zarfe. Por Rama ishte i bindur se deputetët e duhur, (ministrja e duhur), do të shkruanin emrin e duhur. Emri i duhur ishte aty që ditën e parë të nisjes së procesit.

Më pas Rama mblidhte herë pas here Kryesinë dhe nuk fliste për emrat dhe bënte debat "parimor" për kriteret. Dhe të gjithë derdimenët që nuk ishin ata të duhurit, që kishin plotësuar emrin e duhur, zienin ujë në havan.

2 muaj rresht tenderi presidencial i sekretuar në zarfet e propozimeve, u bë tema e kafeneve midis shqiptarësh.

Ndërkohë, të bindur që paaftësia e figurinave të opozitës do t'i jepte një dorë "procesit", u ftua opozita dhe disa të mjerë që e përfaqësojnë që të nxirrnin ca emra. Të mjerët e opozitës, ndërsa emri i duhur rrinte i qetë mes zarfeve, u mblodhën dhe hapën një garë ku secili si kandidat për President propozoi shoqninë e vet të ngushtë.

Dhe i hodhi nëpër media duke i kërkuar Ramës që të harronte tenderin e vet të paracaktuar në zarfet e veta dhe të zgjidhte midis emrave të shoqnisë së tyre!

Ishin të shumtë ata që insistonin drejt logjikës sipas të cilës Rama po i shërbente skemës së vet që e çonte drejt emrit të paracaktuar drejt tij. Brenda dhe jashtë grupit të propozuesve të shoqnisë, vluan këshillat se skema e Ramës nuk vritej dot me imitimin e zhgarravitur të asaj skeme. Por Alibeaj dhe të vetët mbetën stoik në budallallëkun e vet. Donin tenderin e tyre me kushtin që emrin ta zgjidhte dhe firmoste Rama!

Ndërsa Rama dhe të vetët ishin dukshëm shumë të qetë sepse gjithçka po shkonte sipas skemës.

Emri i duhur kishte hyrë në zarfe. Duhej kryer procesi i demonstrimit të budallallëkut të opozitës që më pas të vijohej me nxjerrjen e emrit të duhur nga zarfi/zarfet e duhur.

Asnjë surprizë nga opozita!

Por ndërkohë niveli i propozimeve që dolën nga tavolina e shoqnisë, u kishte mbyllur çdo shteg debateve për cilësinë e kandidatit të duhur për President.

Rama ishte i qetë! Ai nivel shoqnie që prezantoi opozita, justifikonte gjithçka kishte hyrë në zarfet e sekretuar të socialistëve.

Rama priste me durim dhe me qesëndi ditën e duhur.

Dhe dita e duhur erdhi! Dje u mblodh Kryesia dhe u "shoshitën" listat e emrave të dalë nga propozimet e deputetëve. Jo vetëm sekretari i përgjithshëm i partisë, por edhe Rama vetë u surprizua nga inteligjenca e treguar nga disa deputetë në identifikimin e Bajramit.

Surprizuesit, ne nuk do t'i marrim vesh kurrë se cilët ishin. Midis modestisë që gëlon në grupin parlamentar socialist, është e vështirë që të shpresojmë që propozuesja/propozuesit të rrahin gjoksin për zgjedhjen e bërë kur shkruan emrin e Bajramit.

Rëndësi kishte procesi!

Por më shumë rëndësi kishte që nga procesi të dilte që nuk ishte Rama që zbuloi Bajramin!

Siç kishte rëndësi që procesi t'i vinte të gjithë përpara faktit të kryer me Bajramin për votim.

Dhe sigurisht që të linte sa më pak kohë për debat mbi kandidatin.

Procesi i stisur synonte të ruante kandidatin deri në sekondën e fundit kur gjithçka të dukej fakt i kryer. Dosja në SPAK për kandidatin flet më shumë se gjithçka për hallin e Ramës.

Ndërkohë që opozita po qan ende shoqninë që nuk e bëri dot president, skuthllëku që na qeveris nxori një dosje SPAK-u për President. Ndërsa Rama u kujdes të thotë që nuk e kishte propozuar ai Bajramin.

Rama si gjithmonë nuk propozon, nuk zgjedh, nuk ka lidhje me asgje. Por ndryshe nga herë të tjera kur gjithmonë i njohim ata të tjerët që i dalin për zot gjërave, kësaj radhe zarfet e selektuar nuk do të na japin shansin të marrim vesh më shumë.

E sigurtë ëshrë që dosja në SPAK zgjodhi Bajramin si President./E.K-CNA.al

Lajmet e fundit nga