web counter
LEXO PA REKLAMA!

SHKARKO APP

App Store
Google Play

E fundit!

x

Të gjitha rrugët e inceneratorit të çojnë tek Erion Veliaj

8 Gusht 2025, 10:32, Denoncim CNA

Të gjitha rrugët e inceneratorit të çojnë tek Erion

Inceneratorët janë afera shekullore, gropa më e madhe e korrupsionit në më shumë se tri dekada.

Një aferë që nis me Elbasanin, ku kemi një kazan me naftë që nuk funksionon, vijon me Fierin ku kemi një incenerator, i cili nuk ka përfunduar e si rrjedhojë nuk funksionon dhe përfundon në Tiranë ku dhe ka ndodhur korrupsioni më i madh, pasi janë paguar 128 milionë euro dhe inceneratori thjesht nuk ekziston, por ashtu siç e kemi raportuar është vetëm një gropë e madhe me plehra në prag katastrofe që nuk djeg plehrat, por “djeg” vetëm paratë e qytetarëve shqiptarë dhe buxhetit të shtetit.

Një aferë korruptive, rreth një miliard euro, me projeksion dhe përllogaritje ekspertësh që fillonte me një kontratë koncesionare prej 300 milionë eurosh për ndërtimin e një inceneratori, ku u paguan gati 60-70 milionë euro nga shteti shqiptar dhe vazhdojnë të paguhen ende nëpërmjet Bashkisë Tiranës për një incenerator që nuk ekziston dhe nuk u ndërtua kurrë.

Një kontratë skandaloze koncesionare, një aferë e pastër që vit pas viti tregoi se dy instrumente afër qeverisë si Mirel Mërtiri dhe Klodian Zoto fshiheshin pas kompanisë “Integrated Energy” në Holandë, tashmë e quajtur “Geogenix”. Kjo është pjesa e parë, inceneratori.

Prej vitesh ka filluar një hetim, qindra-mijëra dokumente të çuara nga opozita, nga politika, nga mediat për një skemë korruptive ku janë të përfshirë zyrtarë të lartë të shtetit shqiptar, drejtorë, ish-drejtorë, një ish-ministër është pas hekurave dhe po vuan dënimin, po ashtu një ish-sekretar i Përgjithshëm ndodhet në burg i dënuar për aferën, drejtorë dhe zyrtarë të tjerë në burg dhe nën hetim. Ende për aferën e inceneratorit të Tiranës nuk kemi një akuzë për kryebashkiakun e Tiranës, Erion Veliaj, i cili ndodhet në burgun e Durrësit për 13 akuza për vepra të rënda penale, i cili është i implikuar në këtë aferë.

TË GJITHA RRUGËT E INCENERATORIT TË TIRANËS TË ÇOJNË TEK ERION VELIAJ.

FAKTET

Erion Veliaj është njeriu që ka kërkuar ndërtimin e inceneratorit të Tiranës.

Këtë e keni në video, në të cilën mund të dëgjoni ku thotë se është ai që i ka kërkuar kryeministrit Edi Rama të ndërtojë një incenerator, të japë fonde për landfillin e Tiranës dhe pikërisht për një incenerator që nuk ekziston.

 


CNA ka publikuar një shkresë të Erion Veliajt në cilësinë e kryebashkiakut të Tiranës, që i përket marsit të vitit 2017, drejtuar Alqi Bllakos në atë kohë sekretar i Përgjithshëm i Ministrisë së Mjedisit ku shprehet se është dakord me çmimin 29 euro/ton për mbetje.

 

Shkresa (KËTU)

-Erion Veliaj sabotoi në mënyrë të vazhdueshme dhe të pandalshme funksionin e Njësisë së Zbatimit që do të kontrollonte gjithçka që ndodhte.

Veliaj firmosi shkresën duke shmangur Këshillin Bashkiak, pasi nuk mund të vendoste dot me qejfin e tij nëse do të ndërtohej apo jo inceneratori, ka detyrime ligjore pushteti vendor, janë të mirëpërcaktuara se si veprohet.

-CNA ka publikuar një tjetër dokument që implikon Veliajn në aferën e inceneratorit të Tiranës, që në fakt të çon në një aferë tjetër që është ajo e dherave.

Dokumenti firmoset nga drejtorët e Erion Veliajt dhe çon rreth 60 milionë euro në xhepat e kompanisë së inceneratorit të Tiranës, të tjera para këto që paguhen nga biznesi, por në fakt u faturohen qytetarëve në kosto në blerjen e apartamenteve apo punimeve të ndryshme që zhvillohen.

Erioni në këtë rast nuk ka firmosur vetë, ka vënë vartësit e tij, të cilët kanë përdorur edhe vulën e Bashkisë së Tiranës.

Edhe në këtë dokument që na tregon se si i jepen 60 milionë euro kompanisë së inceneratorit të Tiranës që nuk ekziston duke shfrytëzuar resurset shtetërore, kapacitetet e Bashkisë Tiranë, për të mbushur xhepat e një privati.

-Inaugurohet një kopsht, një shkollë në Tiranë, dhe Erion Veliaj shfaqet në foto me Giuseppe Ciaffaglione-n, administratorin e dytë të kompanisë.

Dalin mesazhet e Mirel Mërtirit dhe Klodian Zotos, të cilët habiten se nuk kanë dijeni që po inaugurohet shkolla, pasi Erioni e ka bërë sipas kokës së tij.

Fakti tjetër është që kompania e inceneratorëve vendos instalacione duke paguar bashkëshorten e Veliajt, Ajola Xoxën dhe artistë, të cilët në fakt nuk ekzistojnë më, janë zhdukur ashtu siç nuk ekziston dhe inceneratori.

Përveç Veliajt, ka lidhje që çojnë edhe Ajola Xoxën te landfilli i Sharrës dhe inceneratori i Tiranës.

Lidhja e parë

Ajola Xoxa asistonte kompaninë “MEG Albania”, përgatiti dokumentet për kompaninë që të merrte biznesin e mbetjeve në landfillin e Sharrës, vetëm pak muaj pas vrasjes së Ardit Gjoklajt në 2017, në kohën kur kryetar i Bashkisë Tiranë ishte bashkëshorti i saj, Erion Veliaj.

Lidhja e dytë

CNA në prill të vitit 2024 publikoi një kontratë që lidhej me promovimin e një artisti kontemporan, Sislej Xhafa, i cili ka përdorur për promovimin e veprës së tij “Bleta”, “Harabelin” e Ajola Xoxës.

Nga investigimi CNA zbuloi se fondet për kurimin, promovimin dhe instalimin e veprës ishin vënë në dispozicion të “Harabelit” nga “Integrated Energy”, kompania e inceneratorëve.

Pra, të gjitha këto fakte që i kemi renditur më lart tregojnë vetëm një të vërtetë të madhe që të gjitha rrugët e inceneratorit që nuk ekziston të çojnë tek Erion Veliaj./ CNA

 





Lajmet e fundit nga