LEXO PA REKLAMA!

SHKARKO APP

Pas padisë në SPAK, Olsi Rama ultimatum: Ose unë, ose Bardhi në burg

2 Prill 2024, 14:56, Aktualitet CNA
Pas padisë në SPAK, Olsi Rama ultimatum: Ose unë, ose Bardhi
Olsi Rama, vëllai i kryeministrit Edi Rama

Olsi Rama, vëllai i kryeministrit Edi Rama, ka reaguar pasi kallëzoi në SPAK nënkryetarin e PD-së, Gazment Bardhi, lidhur me akuzat e ngritura nga ky i fundit për lidhje me dosjen “Xibraka”.

Olsi Rama pretendon se akuzat ndaj tij janë politike për shkak të lidhjeve familjare me kryeministrin.

Ai shprehet se ka besim te SPAK-u, ndërsa thekson se është në dispozicion të hetimit të atyre provave të Gazment Bardhit.

Olsi Rama nënvizon se nga kjo çështje ose do të shkojë ai në burg si trafikant ose Bardhi do të ndiqet penalisht dhe do të dënohet si fabrikues provash.

Deklarata e plotë:

Sot kam depozituar në SPAK kallëzimin për deputetin e paturpshëm Gazment Bardhi, i cili ka cenuar publikisht nderin dhe dinjitetin tim publik, si individ, prind dhe drejtues i një klubi të mirënjohur futbolli, duke shpikur një lidhje totalisht inekzistente mes meje dhe një grupi trafikantësh të drogës.

Fakti që zotëria aspak i nderuar, ka marrë përsipër të më akuzojë si trafikant droge, thjesht dhe vetëm sepse unë jam vëllai i një kundërshtari politik, të cilin prej vitesh tanimë janë sfilitur më kot ta mundin, duke mos lënë asnjë anëtar të familjes sonë pa sulmuar me gjuhën e pistë të shpifjeve, kërkon përgjigje! Jo thjesht nga unë, po nga drejtësia!

Unë nuk jam politikan dhe s’kam asnjë lidhje tjetër me politikën, përveçse si votues i tim vëllai ashtu si qindra e mijëra të tjerë dhe arsyeja kryesore e neverisë sime të hershme me politikën është pikërisht kthimi i shpifjeve në një normalitet të jetës publike. Uroj shumë që SPAK-u, tek i cili bashkë me plot të tjerë kam edhe unë besim, si diçka ndryshe në zullumin kaq vjeçar të drejtësisë, të mos e çojë kallzimin tim në koshin e madh të këtij normaliteti absurd, që po shkatërron fare bazën elementare të besimit te fjala dhe të vërtetat e këtij vendi. Pra po shkatërron vetë shoqërinë dhe po hedh në erë në mënyrë të pariparueshme themelet e edukatës për rininë.

Jam i gjithi në dispozicion të hetimit të atyre që deputeti i pacipë i quan prova mbi përkatësinë time në një grup kriminal trafikantësh droge, ndërsa unë nuk mund t’i quaj ndryshe përveçse si shpifje për një fabrikim pervers me qëllim manipulimin e opinionin publik, për motive të dobëta politike.

Troç fjala këtu s’mund të ketë dy të vërteta dhe ose unë duhet të shkoj në burg si trafikant ose Gazment Bardhi duhet të ndiqet penalisht dhe dënohet si fabrikues provash në dëmin tim, të fëmijëve të mi, të klubit të futbollit “Partizani”, të miqve të mi dhe të njohurve të mi.

Solidariteti i këtyre të fundit gjatë këtyre ditëve më lumturon, po nuk më mjafton. Shoqëria duhet të dijë të vërtetën dhe duhet ta mësojë nga drejtësia. Shqipëria s’mund të ketë një kryeministër që e ka vëllain një trafikant droge që lëviz i lirë nëpër Tiranë. Sikur edhe vetëm një shqiptar i ndershëm të gënjehet nga kjo maskaradë dhe ta besojë këtë çmenduri, të cilën as vetë sharlatani që e ka hedhur në pazarin e llafeve nuk e beson, kjo mjafton që drejtësia të mos heshtë duke e nënvleftësuar peshën e kësaj poshtërsie si as e para dhe as e fundit.

Dikush, dikur, diçka, duhet të bëhet sebep që ky turp kombëtar i pashoq me asnjë vend në Europë – ku njerëz me mandate nga populli, me një mikrofon në ekran apo me një portal në internet gënjejnë e sajojnë po aq shumë sa marrin frymë – të goditet nga e vërteta e drejtësisë së re.

Nëse është vërtetë e re natyrisht! Me shpresë, Olsi Rama./ CNA

Lajmet e fundit nga