Aksidenti me 8 viktima/ ISP, thirrje qeverisë: Mbulo shpenzimet e klandestinëve

2 Prill 2024, 14:48, Aktualitet CNA

Aksidenti me 8 viktima/ ISP, thirrje qeverisë: Mbulo shpenzimet e

Instituti i Studimeve Politike (ISP) ka dalë me një deklaratë për aksidentin tragjik në Këlcyrë, ku humbën jetë 8 persona, njëri prej të cilëve shoferi shkodran dhe 7 të tjerët klandestinë.

ISP shpreh ngushëllime për familjet e viktimave, ndërsa apelon organet për identifikimin e tyre.

Gjithashtu, ISP i kërkon qeverisë shqiptare që të mbulojë të gjitha shpenzimet e dërgimit të trupave të tyre pranë familjeve në vendin e origjinës, duke theksuar se humbja e jetës në territorin tonë është përgjegjësi ligjore dhe morale.

Në deklaratë theksohet se autoritetet duhet të fillojnë një proces të thelluar hetimor, transparencë dhe llogaridhënie të plotë nga organet përgjegjëse.

“Lajm i trishtë dhe ngjarje tragjike humbja e jetës së 8 qytetarëve, midis të cilave 7 shtetas të huaj, emigrantë, viktima të kalimit në territorin tonë përmes linjave të paligjshme të trafikut klandestin.

Duke qenë një vend me histori të shumta tragjike dhe humbje jetësh të pafajshme në përpjekje për emigrim drejt vendeve të tjera, rasti i sotëm përbën ngjarjen më tragjike me emigrantët e huaj tashmë drejt vendit tonë.

Duke u shprehur ngushëllimet familjeve të prekura nga ngjarja tragjike, ISP apelon organet për identifikimin e tyre, si dhe qeverinë shqiptare që të mbulojë të gjitha shpenzimet e dërgimit të trupave të tyre pranë familjeve në vendin e origjinës. Kalimi i paligjshëm i kufirit është shkelje ligjore, por humbja e jetës së tyre në territorin tonë është përgjegjësi ligjore dhe morale. Ata ishin viktimë të linjave të trafikut brenda Shqipërisë, por edhe e mungesës së zbatimit të ligjit.

Ky është rasti për të shprehur edhe keqardhjen që ngjarje të tilla nuk janë parandaluar përmes masave më efektive kundër linjave të trafikimit klandestin, për kontrollin më të mirë kufitar dhe rrugor. Po ashtu është rasti për të kërkuar nga autoritetet një proces të thelluar hetimor, transparencë dhe llogaridhënie të plotë nga organet përgjegjëse.

Instituti i Studimeve Politike (ISP) monitoron plotësimin e kushteve të BE-së nga Shqipëria, përfshirë edhe aspekte në fushën e të drejtave të njeriut dhe krimit të organizuar, në integritetin e institucioneve dhe nivelin e jetësimit të shtetit të së drejtës”, thekson ISP./ CNA