LEXO PA REKLAMA!

SHKARKO APP

Bandat kriminale, droga dhe McGonigal/ “Finacial Times”: Rama, i zvarritur në disa skandale

15 Mars 2023, 10:25, Aktualitet CNA
Bandat kriminale, droga dhe McGonigal/ “Finacial Times”: Rama, i
Foto ilustruese

Prestigjiozja “Financial Times” i ka kushtuar një artikull Shqipërisë, luftës me bandat kriminale si dhe skandaleve, ku përmend rastin e kryeministrit Edi Rama dhe lidhjet me Charles McGonigal, ish-agjentin e FBI-së.

"Edi Rama, kryeministri i Shqipërisë, është një nga liderët properëndimorë në Ballkan, që erdhi në pushtet duke premtuar goditje të pamëshirshme ndaj bandave kriminale.

Një dekadë nga qeverisja e tij dhe përpjekjet për të përmbushur këtë premtim po bëhen gjithnjë e më të vështira, pasi është tërhequr zvarrë në disa skandale që kanë njollosur imazhin e tij brenda dhe jashtë vendit”, shkruan ndër të tjera “Financial Times”.

Më tej shkruhet se bandat shqiptare janë zgjeruar nga plantacionet ilegale të kanabisit deri te trafikimi i kokainës dhe heroinës direkt nga Amerika Latine dhe Azia. Miliona euro u derdhën në Shqipëri, duke ndihmuar në zhvillimin e pasurive të paluajtshme luksoze përgjatë bregdetit të Mesdheut.

Stili i shkëlqyer i jetesës së gangsterëve në një nga vendet më të varfra të Europës është në kontrast të fortë me luftën e shqiptarëve të zakonshëm, shumë prej të cilëve zgjedhin të emigrojnë. Një e treta e qytetarëve të vendit jetojnë jashtë vendit, ku emigracioni në MB ka tensionuar marrëdhëniet me Londrën.

Në artikull theksohet se reputacioni i Ramës jashtë shtetit është dëmtuar pas përmendjes për lidhjet e tij me ish-agjentin McGonigal.

Reputacioni i Ramës jashtë shtetit është dëmtuar gjithashtu nga kontaktet e tij me një zyrtar të turpëruar të zbatimit të ligjit në SHBA, i akuzuar se ka ndihmuar liderin shqiptar për të përndjekur rivalët politikë.

Departamenti amerikan i drejtësisë akuzoi ish-shefin e kundërzbulimit të FBI-së, Charles McGonigal në janar për shkelje të sanksioneve të SHBA-së dhe përfshirje në pastrim parash duke punuar për oligarkun rus Oleg Deripaska.

Një aktakuzë e veçantë fokusohet në kontaktet e padeklaruara të McGonigal me Ramën dhe pretendon se ai kryente shërbime me pagesë për shqiptarët. McGonigal akuzohet se ka marrë të paktën 225 mijë dollarë nga një oficer i inteligjencës shqiptare dhe më pas ka kaluar informacione nga zyra e Ramës tek autoritetet amerikane. Ata nga ana e tyre hapën një hetim për një lobist me bazë në SHBA që punonte për opozitën shqiptare.

Rama mohon të ketë përdorur kontaktet e tij me McGonigal për këtë qëllim. Ai vuri në dukje se çështja McGonigal nuk ngriti asnjë akuzë kundër tij dhe tha se ai është 'përdorur si kokë turku nga shumë individë në Shqipëri që kanë problemet e tyre të vazhdueshme me sistemin e drejtësisë'", shkruhet ndër të tjera në artikull./ CNA.al

Lajmet e fundit nga