Irlanda çlirohet nga “stuhia” e Omicron/ Qeveria heq shumicën e kufizimeve, edhe pasaportën e vaksinimit

22 Janar 2022, 08:03, Lifestyle CNA

Irlanda çlirohet nga “stuhia” e Omicron/ Qeveria heq

Qeveria Irlandeze ka rënë dakort që të heqë pothuajse të gjitha kufizimet e vendosura për Covid 19.

Kryeministri irlandez, Micheál Martin, në një konferencë për shtyp u shpreh se kjo është një ditë e mirë për Irlandën pasi ka përballuar stuhinë e Omicron.

Martin u shpreh se qytetarët nuk do të kenë më nevojë të tregojnë pasaportën e vaskinimit për të hyrë në ambiente të ndryshme.

Gjithashtu do të hiqen masat kufizuese për baret, restorantet dhe klubet e natës, duke kthyer kështu gjithçka në normalitet.

Kryeministri irlandez konfirmoi se do të hiqen kufizimet përsa i përket grumbullimeve për festa familjare apo ngjarja të tjera. Gjithashtu do të marrë fund edhe puna nga shtëpia për shumë njerëz, dhe gradualisht do të lejohet kthimi në ambientet e punës.

Por ka disa rregulla që do të vijojnë të jenë ende në fuqi, si përshembull, vendosja e maskave në transportin publik apo në institucione.

Udhëtarët do të duhet gjithashtu të përdorin pasaportën Covid, e cila tregon prova dixhitale të kryerjes së vaksinës ose rezultatet e fundit të testit, në mënyrë që të udhëtojnë ndërkombëtarisht.

Kreu i qeverisë e nisi konferencën e tij për shtyp duke falënderuar publikun për bashkëpunimin me masat emergjente shëndetësore dhe pranoi vështirësitë që kishin shkaktuar rregullat.

Martin tha se informacionet nga zyrtarët e shëndetit publik kishin konfirmuar se shkalla e infeksionit po binte dhe të gjithë treguesit e tjerë kyç të përdorur për të monitoruar Covid-in po shkonin në drejtimin e duhur.

Ai tha se vaksinimi dhe programi përforcues i Irlandës “e kishte transformuar plotësisht situatën e vendit?.

Taoiseach gjithashtu paralajmëroi se vendimi për të hequr “shumicën” e kufizimeve të Covid të Irlandës mund të çojë në një rritje të përkohshme të infeksioneve dhe ai u kërkoi njerëzve të marrin vaksinat./ CNA.al