web counter
LEXO PA REKLAMA!

SHKARKO APP

App Store
Google Play

Partizani humbet titullarin para sfidës me Skënderbeun

29 Nëntor 2021, 08:31, Sport CNA

Partizani e fitoi ndeshjen e fundit ndaj Teutës, duke u kthyer te fitorja pas atij barazimi me Laçin në javën e nëntë. Ishte një ndeshje shumë e luftuar, të cilën të kuqtë e sollën në shinat e tyre vetëm në fund. Por edhe kjo fitore e kishte një faturë në aspektin negativ. Albion Marku nuk i mbajti nervat ndaj Aleksit në minutën e 87 dhe arbitri e nxori jashtë lojës pas të verdhit të dytë.

Ky karton i kuq e privon mbrojtësin e djathtë të jetë prezent në ndeshjen ndaj Skënderbeut më datë 4 dhjetor. Ish-anësori i Laçit ishte një nga më të mirët ndaj Teutës dhe gjatë gjithë këtij sezoni ka qenë zgjedhje e parë e trajnerit Ilir Daja. Mungesa e tij është një problem aspak i vogël për teknikun e të kuqve, duke qenë se Gligorov, i cili pritet ta zëvendësojë 21-vjeçarin, nuk ka treguar nivelin për të mbuluar tërësisht mungesën e mbrojtësit, në pronësi të Lokomotivës.

Nga ana tjetër, lajm i mirë është fakti se asnjë lojtar tjetër nuk mungon për shkak kartonësh, teksa i vetmi me tre të tillë është Ergys Kaçe. Në rast se mesfushori ndëshkohet ndaj Skënderbeut, do të detyrohet të mungojë në ndeshjen kundër Vllaznisë, tjetër duel delikat dhe i rëndësishëm për vazhdimësinë.





Lajmet e fundit nga