PD tha përfitoi pa të drejtë bonusin e qirasë/ Kryetari i PS publikon fotot e banesës së shkatërruar

15 Dhjetor 2019, 09:36, Politikë CNA

Kryetari i PS në Radë të Manzës, Armand Basha i është përgjigjur akuzave të PD-së lidhur me bonusin e qirasë që ka përfituar, pasi banesa e tij u shpall e pabanueshme.

Basha deklaron se banesa e tij në fshatin Radë është dëmtuar rëndë nga tërmeti i 26 nëntorit dhe për këtë arsye është shpallur e pabanueshme.

?Për fat të mirë, unë dhe familjaret e mi, shpëtuam shëndoshe e mirë, por praktikisht banesa ime private në fshatin Radë, Manëz (Durrës), ku unë dhe familjaret e mi jetojmë, u demtua rëndë dhe është e pabanueshme, vërtetuar kjo dhe nga akt- konstatimi i banesës, firmosur nga ekipi i specialistëve të ardhur nga Turqia?, deklaron socialisti, teksa përgënjeshtron opozitën.

?Papritur e papandehur, sot u gjenda i ballafaquar me sulmin zyrtar të Partisë Demokratike, për shkak të funksionit përfaqësues, që kam për Partinë Socialiste në këtë zonë, ku nëpërmjet një deklarate zyrtare të tyre, hamendësojnë se kam përfituar bonuse qeraje për vete dhe familjarët e mi, në mënyrë të pamerituar, si privilegj për faktin se jam pjesë përfaqësuese e PS-së. Mendoj se PD-ja, duhet të gjente kohë për solidaritet, jo për sulme personale që është pak të thuash, se janë tepër banale e mediocre?, thekson ai.

Gjithashtu Basha ka publikuar një certifikatë familjare, disa foto të banesës private pas dëmtimit dhe akuzat e PD, ndërsa i bën thirrje opozitës të jetë solidare.

?Në përfundim, i ftoj të gjithë miqtë opozitarë, të jenë fillimisht solidarë dhe human, pastaj militantë, pasi s’është korrekte dhe as e falshme, të cënohem e shqetësohem familjarisht, për kreditin e tyre politik. Gjithashtu, gjej rastin ti sqaroj, që tërmeti nuk njohu parti politike, por vetëm viktima, pa asnjë dallim dhe unë e familjaret e mi, ishim disa prej tyre dhe u trajtuam si të tillë, jo si militantë të PS-së (këtu gjithsesi dua t’ju kujtoj se pëlqimi,përkatësia dhe përfaqesimi politik, mbrohet si e drejtë njerëzore nga Kushtetuta e Republikës së Shqiperisë, sepse është pikërisht vlerë demokracie dhe jo krim)?, shkruan socialisti ndër të tjera në një postim në rrjetet sociale./ CNA.al