Marrëveshja me Greqinë/ Po shqyrtohen tekstet shkollore të dy palëve. A u fol për Çamërinë

31 Janar 2018, 16:42, Aktualitet CNA

Glevin Dervishi, këshilltar në Ministrinë për Europën dhe Punët e Jashtme, i ftuar në studion e televizionit News 24, foli për diskutimet Shqipëri-Greqi si dhe deklaratën e ministrit grek, Nikos Kotzias, i cili u shpreh se Shqipëria ka pranuar ta lejojë Greqinë të zgjerohet me 12 milje det.

Teksa u ndal tek problematika me librat shkollorë, Dervishi u shpreh se është e hasur në tekstet shkollore të të dyja palëve, e kësisoj po punohet për korrigjimin e tyre. Më tej ai u shpreh se çështja në fjalë është problematike nga të dy palët.

Po ashtu ai foli edhe për marrëveshjen mes palëve për njohjen e patentave dhe mospasja nevojë për patentë ndërkombëtare. Dervishi u shpreh se kjo do të arrihet së shpejti. Në vijim ai tha se palët kanë diskutuar edhe për çështjen çame, ndonëse pala greke shprehet se nuk e njeh këtë çështje.

Sa i përket marrëveshjes për delimitimin e hapësirave detare, tha:

“Në 2009 u krye një proces për të arritur një marrëveshje për delimitimin e hapësirave detare që u hodh poshtë nga Gjykata Kushtetuese. Së pari është një çështje e karakterit juridik. Çdo lloj marrëveshje që do arrihet me qeverinë greke do të reflektojë problematikat që ka konstatuar Gjykata Kushtetuese. Në kushtet që dy vendet do arrijnë një marrëveshje së pari do të ngrihen grupet e punës në terren. Jemi në pikën që është diskutuar me palën greke që të arrijmë një marrëveshje që të përmbajë problematikat e ngritura nga Kushtetuese. Pala shqiptare synon të arritje një marrëveshje që të bazohet në të drejtën e detit, praktikat ligjore, dhe ligjet në fuqi.

Në një moment të dytë do të shtohet në kalimin në një fazë tjetër. Unë nuk di të them nga u gjeti ministri grek 12 mijë miljet. Por çështja është se ne duam të arrijmë drejt një marrëveshje që të përfshije komponentët kryesore. Në momentin që palët kanë gjetur gjuhën e përbashkët për të arritur një marrëveshje, atëherë palët do të përgatiten për ngritjen e grupeve të ekspertëve dhe realizimin e procedurave. Nuk ka një afat fiks sa kohë mund të kërkojnë procedura. Deri më tani secila palë ka bërë një lloj vlerësimi dhe analize.” /CNA.al