E fundit!

20:44 Aktualitet

FOTOT-Jemi “protestues strategjikë”/ Në protestë edhe kafshët

Në protestën e ditës së sotme pjesëmarrës nuk kanë qenë ve...

U fut në histori, Mbappe: Nuk është hakmarrje për kritikat

17 Qershor 2026, 08:28, Sport CNA

Kylian Mbappe vazhdon të shkruajë historinë e futbollit francez. Sulmuesi ishte figura kryesore në fitoren 3-1 ndaj Senegalit në ndeshjen e parë të Grupit I të Kupës së Botës, duke realizuar dy gola dhe duke vendosur një rekord të ri me kombëtaren e tij.

Në një mbrëmje që fillimisht rezultoi më e komplikuar sesa pritej për skuadrën e Didier Deschamps, Mbappe u shfaq në momentin më të rëndësishëm. Senegali rezistoi gjatë dhe madje krijoi raste të rrezikshme, por në minutën e 66-të sulmuesi francez gjeti rrugën e rrjetës pas një aksioni të ndërtuar nga Olise.

Ishte një gol me peshë të dyfishtë, pasi e çonte Mbappe-në në të njëjtën kuotë realizimesh me Olivier Giroud në renditjen historike të golashënuesve të Francës.

Në minutat shtesë, Mbappe i vuri vulën ndeshjes. Sulmuesi goditi nga distanca dhe shënoi golin e tij të dytë personal, duke fiksuar rezultatin 3-1. Ky realizim kishte një rëndësi historike, pasi e ngjiti të vetëm në krye të listës së golashënuesve të kombëtares franceze me 58 gola, duke lënë pas Olivier Giroud.

Rekordi i ri konfirmon edhe një herë ndikimin e Mbappe-së te Franca. Në moshën 27-vjeçare, ai ka ndërtuar tashmë një karrierë të jashtëzakonshme me fanellën e "Les Bleus". Ky është Botërori i tretë për lojtarin. Në vitin 2018 fitoi trofeun në Rusi, ndërsa në vitin 2022 arriti deri në finale, ku Franca u mposht nga Argjentina. Në total, ai numëron tashmë 14 gola dhe 3 asistime në 15 ndeshje të Kupës së Botës, shifra që e vendosin mes emrave më të rëndësishëm të historisë së këtij kompeticioni.

Pas ndeshjes, Mbappe preferoi të mos fliste për rekordin personal si objektivin kryesor. Sulmuesi u shpreh se një fitore në ndeshjen e parë nuk garanton asgjë në një turne kaq të gjatë. Ai theksoi se është e rëndësishme të nisësh mirë kompeticionin, por kujtoi se shumë skuadra kanë hasur vështirësi që në ndeshjet e para.

Mbappe foli edhe për kritikat që ka marrë gjatë karrierës, duke deklaruar se nuk luan për t’iu përgjigjur kritikëve, por për të shkruar historinë e tij me Francën. Sipas tij, objektivi kryesor mbetet të ndihmojë skuadrën të arrijë në finale dhe të luftojë për fitimin e Kupës së Botës.

“Sinqerisht, nuk mendoj se kemi asgjë ende, por është gjithmonë e rëndësishme të nisësh mirë një garë. Të jep pak më shumë qetësi, pavarësisht se sa e qetë mund të jetë një Kupë Bote. Pamë vështirësitë e ekipeve të tjera. Sot nuk ishte një ndeshje e lehtë, por e dimë që mund të bëjmë diferencën në çdo moment.

Nuk ka hakmarrje ndaj atyre që më kritikojnë. Nëse do të më duhej të luaja për ta dhe t'i heshtja, do të më duhej të qëndroja në fushë deri në moshën 80 vjeç. Unë luaj për të bërë histori dhe për vendin tim, dhe për t'u siguruar që ekipi im të arrijë në finale dhe të fitojë Kupën e Botës. Tani duhet të ruajmë qetësinë. Do të duhet të fitojmë kundër Irakut për t'u kualifikuar”, deklaroi ai.