Messi-Yamal, misteri i numrit 19. Sa shumë të përbashkëta

18 Korrik 2026, 10:02, Sport CNA

Spanja dhe Argjentina po përgatiten për finalen e madhe të Kupës së Botës, një ndeshje që do të vendosë përballë kampionët e Europës dhe kampionët në fuqi të botës.

Takimi do të zhvillohet më 19 korrik në stadiumin “MetLife” të Nju Jorkut dhe pritet të ketë në qendër të vëmendjes dy emra që përfaqësojnë dy breza të ndryshëm të futbollit botëror: Lionel Messi dhe Lamine Yamal.

Për Argjentinën, Lionel Messi vazhdon të jetë figura kryesore e skuadrës. Në moshën 39-vjeçare, ai ka udhëhequr sërish kombëtaren drejt finales dhe synon të mbrojë titullin botëror të fituar më parë nga “Albiceleste”.

Në anën tjetër qëndron Yamal. Sulmuesi i ri i Spanjës është një nga lojtarët më të spikatur të këtij Botërori dhe po përjeton një ngjitje të shpejtë në futbollin ndërkombëtar. Pas suksesit në Kampionatin Europian, ai ka mundësinë të luftojë edhe për titullin më të rëndësishëm në futbollin e kombëtareve.

Përveç aspektit sportiv, kjo finale shoqërohet edhe nga një detaj interesant që lidhet me karrierat e dy futbollistëve. Messi dhe Yamal kanë disa ngjashmëri që lidhen me numrin 19, një shifër që është shfaqur vazhdimisht në momente të rëndësishme të rrugëtimit të tyre.

Një nga episodet më të njohura është fotografia e realizuar vite më parë, ku Lionel Messi shfaqej pranë Yamal-it shumë të vogël. Tani, rrugët e tyre kryqëzohen në një finale të Kupës së Botës, 19 vjet pas atij momenti që është rikthyer në qarkullim gjatë ditëve të fundit.

Rastësitë vazhdojnë edhe në karrierën sportive të të dyve. Mesi debutoi në një turne të Kupës së Botës në vitin 2006, në moshën 19-vjeçare. Një situatë e ngjashme është regjistruar edhe për Lamine Yamal, i cili gjatë Botërorit 2026 ka qenë po 19 vjeç.

Një tjetër element i përbashkët është fanella me numrin 19. Të dy futbollistët debutuan në Kupën e Botës duke mbajtur këtë numër në shpinë. Po ashtu, në fillimet e tyre te Barcelona, numri 19 ishte pjesë e identitetit të tyre sportiv.

Mesi e veshi këtë numër në vitet e para te skuadra katalanase, përpara se të identifikohej me fanellën legjendare me numrin 10. Edhe Yamal ka kaluar të njëjtin proces, duke mbajtur numrin 19 përpara se të trashëgonte fanellën me numrin 10.

Finalja e 19 korrikut nuk do të përcaktojë vetëm kampionin e ri të botës, por do të vendosë përballë dy prej figurave më të rëndësishme të futbollit aktual, të lidhura mes tyre nga një histori që nis shumë vite më parë dhe që tani vazhdon në skenën më të madhe të futbollit botëror.