Risi në futbollin italian! VAR për kartonët e verdhë dhe për goditje këndi

17 Korrik 2026, 18:28, Sport CNA

Risi në futbollin italian! VAR për kartonët e verdhë dhe

Sezoni futbollistik 2026/27 do të sjellë një sërë ndryshimesh të rëndësishme në rregulloren e lojës. Shoqata Italiane e Arbitrave ka konfirmuar zbatimin e risive të miratuara nga IFAB. Qëllimi kryesor i këtyre ndryshimeve është të reduktohen ndërprerjet e panevojshme, të përshpejtohet ritmi i ndeshjeve dhe të garantohet më shumë qartësi në vendimet arbitrare.

Një nga risitë më të rëndësishme lidhet me zëvendësimet. Sipas rregullit të ri, futbollisti që del nga fusha duhet të largohet brenda 10 sekondave nga momenti kur arbitri jep sinjalin ose shfaqet tabela elektronike. Nëse ky afat nuk respektohet, lojtari zëvendësues nuk do të mund të hyjë menjëherë në fushë. Ai do të duhet të presë ndërprerjen e parë të lojës pasi të ketë kaluar të paktën një minutë lojë efektive nga rifillimi i ndeshjes. Ndryshime janë vendosur edhe për rivëniet anësore dhe goditjet nga porta. Futbollistët do të kenë vetëm 5 sekonda në dispozicion për ekzekutimin e tyre. Nëse afati tejkalohet gjatë një rivënieje anësore, topi do t’i kalojë skuadrës kundërshtare. Në rastin e vonesës në goditjen nga porta, arbitri mund të akordojë goditje këndi për ekipin kundërshtar.

Një tjetër pikë e rëndësishme ka të bëjë me trajtimin e dëmtimeve. Çdo futbollist i fushës që merr ndihmë mjekësore ose vlerësohet në fushë do të duhet të largohet dhe të qëndrojë jashtë për të paktën një minutë lojë. Përjashtim bëjnë portierët, rastet e përplasjeve të rënda mes lojtarëve dhe dëmtimet që vijnë si pasojë e faulleve të ndëshkuara me karton të verdhë ose të kuq. Edhe sistemi VAR do të ketë kompetenca të zgjeruara. Nga sezoni i ri, mund të ndërhyjë për të korrigjuar raste të qarta të kartonit të dytë të verdhë të dhënë gabimisht. Gjithashtu do të ketë mundësi korrigjimi në rastet kur arbitri identifikon gabim futbollistin që duhet të ndëshkohet me karton të verdhë ose të kuq.

Në disa kompeticione mund të lejohet edhe ndërhyrja e VAR-it për korrigjimin e goditjeve të këndit të akorduara gabimisht, por vetëm nëse vendimi mund të ndryshohet menjëherë pa vonuar rifillimin e lojës. IFAB ka vendosur gjithashtu masa më të forta ndaj sjelljeve të papërshtatshme. Futbollistët që mbulojnë gojën me duar, krahë ose fanellë për t’iu drejtuar në mënyrë provokuese apo fyese kundërshtarëve mund të ndëshkohen me karton të kuq direkt.

Masa të ashpra parashikohen edhe për protestat ndaj arbitrimit. Lojtarët ose drejtuesit që largohen nga fusha për të kundërshtuar vendimet e arbitrit, ose nxisin shokët e skuadrës të bëjnë të njëjtën gjë, mund të përjashtohen. Në rastet kur një skuadër bllokon zhvillimin normal të ndeshjes përmes protestave, parashikohet edhe humbja në tavolinë.

Ndër ndryshimet e tjera përfshihet lejimi i disa aksesorëve dhe bizhuterive, për sa kohë ato janë të mbuluara dhe nuk paraqesin rrezik. Gjithashtu, organizatorët e garave mund të autorizojnë përdorimin e kamerave trupore nga arbitrat për qëllime monitorimi dhe disipline. Rregulla të reja janë vendosur edhe për penalltitë. Në rast se lojtari prek aksidentalisht topin me të dyja këmbët gjatë goditjes dhe topi përfundon në rrjetë, penalltia do të përsëritet. Nëse goli nuk realizohet, goditja do të konsiderohet e humbur, pa ndonjë ndëshkim shtesë me karton.